Recientemente a tuma luga Justitiële Vierlanden Overleg na Barcelo Aruba. E reunion aki ta uno cu ta tuma luga dos biaha pa aña entre ministernan di husticia di Reino. Despues cu e delegacionnan di e cuatro paisnan a hiba un discusion extenso riba varios topiconan di interes comun pa tur paisnan den reino, diamars den oranan di atardi, esaki a termina. Minister Arthur Dowers di Aruba, minister Rafael Boasman di St Maarten, minister Ard van der Steur di Hulanda como tambe minister Ornelio Martina di Corsou, a dialoga durante dicho reunion diamars riba e temanan manera, polis, prizon, traficacion di hende, terorismo, como tambe e Rijkswet cu ta bay over di funcionamento di Hof pa e diferente paisnan..
Durante e conferencia di prensa teni na final di e cumbre, Minister Dowers a yama tanto ministernan Martina di Corsou y Boasman di St. Maarten un cordial bon bini, na nan prome cumbre di JVO. Minister Dowers a sigui bisa; “e reunion aki, como cu tin un ambtelijke aparaat cu ta sostene e reunion y e tin un secretario cual ta haci cu tin un continuidad den un tempo hopi lihe, manera cu a bin ta sosode den e aña aki y tambe eficiente. Nos a logra riba mayoria punto consenso, entre otro riba e discusion cu ta hibando riba prevencion di mensensmokkel”.
Minister Dowers a continua bisando e mandatarionan presente a haya un presentacion di ministerio publico riba aspecto di traficacion di hende, y a mira un adelanto despues di a firma un protocol riba e tereno aki algun tempo atras. “Nos ta felicita St. Maarten cu a logra un T1, cual ta e nivel di mas halto di logro riba tereno di combatimento di traficacion di hende, despues cu nan a desmantela algun organisacion criminal cu ta ocupa nan mes cu esey”, minister Dowers a expresa.
Riba e mesun topico di mensenhandel y mensensmokel, a keda palabra cu pais Aruba ta sigui cu e bon trabao cu a bin ta haci. Loke cu awor mester inverti mas den dje ta, e parti caminda cu ta bay atende cu esunnan cu ta ocupa nan mes cu e fenomeno aki pa persigui nan den corte. Tin un taskforce cu ta bay keda instala na e momentonan aki y ta spera cu pronto Ministerio Publico lo por bay over na e detencion di es nan cu ta haci nan mes culpabel na e echo condenabel aki.
Pa loke ta trata combatimento di terorismo, e ta mas cu logico y comprendibel cu no ta tur cos por wordo comparti cu publico, paso e criminal no por haya sa e plannan cu tin di parti di esnan encarga cu siguridad, pero riba tereno di combatimento di terorismo, minister Dowers a sigura cu tin hopi cu a wordo haci caba y cu a keda palabra un biaha mas entre tur pais den Reino, cu nan lo continua cu esaki tambe.
Hasta cu lo bay uza mas instrumentonan pa fortifica e fronteranan miho ainda sea local of internacional.
Mientras cu e puntonan cu ainda no a logra consenso di parti di Corsou, Hulanda y St. Maarten, segun minister Dowers cu e topiconan aki lo wordo discuti bek dentro di un luna.