Junny Oleana ta completa curso di FINA Waterpolo Referee exitosamente

Arubaanse Zwembond (AZB) tin e placer di informa cu Sr. Junny Oleana recientemente a participa na un curso di FINA na Corsou pa Waterpolo Referee. Aunke boluntario nan di AZB cu kier sigui crece como oficial mester cubri nan mesun gastonan, Sr. Oleana a biaha a Corsou recientemente riba propio gasto pa completa e curso aki, pasa su examen na final di curso y pa awor ta un FINA Waterpolo Referee.

AZB sa cu e situacion aki no ta uno faborabel, pero mirando cu e subsidio no ta yega pa cubri gasto pa e oficial nan sigui algun curso den exterior, AZB ta sumamente contento cu Sr. Oleana a biaha pa Corsou riba su propio gasto pa sigui e curso di FINA Referee di Waterpolo. Cu e papel aki, Sr. Oleana por yuda desaroya e disciplina di Waterpolo den futuro, na Aruba. Pa bo por desaroya un deporte bo mester tin oficial, AZB ta comprende esaki y ta spera cu den futuro nos por yuda nos boluntarionan pa atende mas clinica y competencia. Pa por brinda e oportunidad aki na e oficial nan di AZB, AZB ta aplicando pa mas FINA clinica wordo organisa na Aruba.

FINA clinica
Recientemente AZB a ricibi e noticia for di FINA cu e aña aki, Aruba por organisa 3 clinica. AZB lo tuma e oportunidad aki pa organisa un clinica pa Certificacion pa entrenando di landamento. Esaki ta un programa nobo di FINA cu tin e meta pa yuda tur entrenando di landamento na mundo yega na ta certifica. FINA ta trahando pa tur entrenando cu ta participa den Campeonatonan Mundial i Weganan Olimpico ta certifica pa asina por haya e reconocimento pa nan trabou y logronan. Aruba ta 1 di e 5 pais nan den ful e continente Americano cu a haya e oportunidad aki den 2019. E curso lo ta parcialmente online y ta wordo conclui cu un parti practica despues. AZB tambe a haya un clinica pa entrenando pa Open Water y un clinica pa entrenando di Waterpolo. Pa e deporta acuatico nan aki por sigui crece AZB ta kere den educa mas persona den e dos ramonan aki. Detaye tocante cada clinica lo wordo anuncia despues.

Water Polo
Aña pasa AZB a cuminsa cu e desaroyo di e disciplina di Open Water y a instala un comision tecnico di Open Water. E comision aki ta encarga di planea competencia y desaroya e disciplina aki. Nan prome competencia pa 2019 a tuma luga e weekend cu a pasa y tabata uno exitoso, cu 91 participante y 4 cualificacion pa CARIFTA 2019. Mirando cu tin un team activo den e disciplina di Water Polo, esta Aruba Dolphins, AZB kier instala un comision tecnico pa e disciplina di Water Polo tambe. AZB ta spera di por uni cu e grupo di lidernan pa asina Waterpolo por crece y pa Aruba cuminsa participa den competencianan den region di Caribe y Centro America. Aña pasa, Rowin Bisslik a participa den e Congreso di FINA pa Water Polo na unda e reglanan nobo cu a wordo aproba, a wordo discuti. E reglanan nobo tin como meta pa haci e weganan di waterpolo mas interesante pa e publico.

Comments

comments