Na nomber di Fraccion di MFK, parlamentario Juniel Carolina ta gradici minister Gilmar Pisas p’e contestanan riba e preguntanan haci.
Den un comunicado di prensa e ta indica lo siguiente: “Manera nos por a compronde, basa riba e contestanan di minister presidente pa loke ta trata nos futuro Refineria, Minister a splica cu pa habri Refineria, e Ley di Medio Ambiente cu n’e momentonan aki ta cerca Gobernador pa firma pa despues e ley sigui bay pa Parlamento y segun calculo di procedura p’e periodo di tratamento di e ley di Medio ambiente aki den Parlamento pa mas of menos den luna di mart esaki lo ta cla.
Manera a remarca ayera den sala di Parlamento, cu e Ley di Medio Ambiente tin un reto hopi, hopi grandi p’e apertura di nos Refineria.
Pa loke ta trata crudo, Minister presidente a informa k Oil Management a anuncia caba y nos por a tuma nota di esaki den prensa tambe, k despues di e trabaonan di revision, na fin di januari of cuminsamento di februari trabou lo por inicia. Ya tin algun contratista k ta ocupando nan mes cu firmamento di contract y sigur sigur esaki ta un bon noticia caminda cupo di trabou lo habri direct y indirect.
Nos a tuma nota den sala di Parlamento k tin hopi interes riba informacion p’e reapertura di nos Refineria, pero nos mester bisa k na november 2029 a termina y ora k PDVSA a pidi gabinete Rhuggenaath pa prolonga e contract:
A dal PDVSA scop, a baha nan na mal ordo for di riba tereno di Refineria;
A dal porta di Refineria cera;
E mayoria di e trahadonan a perde trabou y ta algun agente di siguridad y algun miembro di e team di ekipo di bombero a keda vigila e Refineria;
Esaki tabatin un impacto socioeconomico negativo pa pais Corsou cu perdida di cupo di trabou y cu un aumento considerabel di desempleo;
E trahadonan a keda desampara, k debe di fiansa, debe di hipoteca, no por a paga huur di cas, e yiunan k tabata studiando a core risico di bira drop-outs pa motibo di e situacion, bastante fastioso di e trahadonan cu aki nan mester a bandona Corsou y sali pa exterior pa busca un miho “porvenir”;
Algun trahado, mas of menos 100, a keda sin cobra nan cen di pensioen y danki na minister presidente sr. Pisas, cu a negosha y cera un “Settlement Agreement“ entre PDVSA y Refineria di Corsou RDK caminda Venezuela lo bay cubri tur debe k PDVSA tin k Corsou, “muy principal” e pensionadonan k a keda desampara pa motibo cu Gabinete Rhuggenaath a dal porta di refineria cera;
Mas motibo di preocupacion pa motibo cu a cera Refineria, si e Refineria lo a keda habri awe lo Corsou no ta tin tur e discusionnan riba aumento drastico di combustibel en general.
Nos por a tuma nota y sigui un cantidad di efecto negativo na momento cu a tuma e decision pa cera nos Refineria y nos ta gradici minister presidente Gilmar Pisas p’e manera cu e desaroyonan rond di Refineria ta canando y nos tin sigur y ta carga e Fe cu un dia nos Refineria lo ta operacional atrobe y cu no solamente Juny so, sino tur cu ta interesa pa bin na remarca pa un cupo di trabou den Refineria cu e posibilidad ta bay existi pa un cupo di trabou.
Hasta Banco Central di Corsou y St. Maarten ta bisa den su boletin Economico di december 2023 caminda nan a para keto n’e impacto di clima riba economia na mundo cu Refineria Isla di Corsou ta keda un opcion pa crea actividad economico.
Ora nos tuma nota di e cantidad di cen cu a gasta pa busca un operado nobo pa Refineria for di januari 2014 te cu december 2020 bou di e diferente gobiernonan, total esaki ta suma un cantidad di 36 miyon den 6 aña compara cu gabinete Pisas II cu a inverti 3.5 miyon den mas of menos 3 aña. Ta hopi placa y sigur ora nos tuma nota di gobiernonan anterior cuanto placa a wordo gasta pa busca un operado nobo y sin keda cla. Sa cuanto cos nos por haci pa comunidad cu 30 miyon? Masha hopi cos mes. Drecha cas, instala mas facilidad deportivo cu yerba, infrastructura, elimina pobresa caminda esaki ta rekeri, lanta fondo p’e sector agrario cu ta percura pa comunidad tin alimento fresco riba mesa pa nos por come saludabel.
Pa loke ta trata remarkenan cu nos a haci riba ”Communicatie en Voorlichting” lo ta bon pa gabinete Pisas II a haci mas uzo di e sector y e medio di comunicacion aki mas eficiente pa duna informacion veredicto, balansa y responsabel pa loke ta trata gobernacion di pais responsabel na comunidad. Nos ta sinti cu tin hende den nos comunidad ta venena pa loke ta trata desaroyo p’e Refineria, pregunta y remarca invalido ta bini dilanti.
Nos ta desea nos prome minister tur clase di forsa sabiduria y exito pa no solamente nos Refineria, pero pa henter e gobernacion di Corsou y asina Corsou sigui crece y bay dilanti y bira un perla den Caribe manera ta e deseo di gabinete Pisas II,” e parlamentario a termina bisando den e comunicado.