Juliana School ta cumpli 130 aña

0
RBC Juli 2018
Funmiles-2018

Skirbi Pa Clyde Harms

Introduccion
E edificio tin un historia largo y interesante. Actualmente e edificio ta funciona como sede di Algemene Rekenkamer. Un tempo e tabata oficina di Sr. Ramon Lee, Minister di Cultura, Labor y Deporte. Algun hende ta cord’e di tempo e tabata Biblioteca Nacional. Tin algun ta bay bek mas leu y nan ta corda tempo Prinses Margrietschool tabata ubica aki (1943-1953). Solamente e mas bieunan di nos hendenan sa cu e edificio aki originalmente tabata e prome scol di gobierno na Aruba cu eventualmente a haya nomber di Juliana School.

“Scol di Gobierno” ta bira Juliana School
Segun “Bouwen Op De Wind, Architectuur en Cultuur van Aruba” di Olga van der Klooster y Michel Bakker, e edificio a keda cla 23 di februari di 1888 y e scol di gobierno a habri 5 di maart. Interesante pa nota cu e scol no tabatin facilidad sanitario. A dura 12 aña, na 1900 e prome WC y labamano a wordo instala! Despues di Fort Zoutman, e edificio aki ta esun mas bieu di gobierno. E “Scol Di Gobierno” tabata un scol L.O. (Lager Onderwijs), y el a keda sin un nomber pa casi 25 aña.
Segun Olga van der Klooster y Michel Bakker e scol a haya nomber Juliana School cu gouvernementsbeschikking Nr 1328 di 16 di december 1921. Mi investigacion di documentonan bieu a laga mi presenta e siguiente hypothesis: Sr. J.K. Zepp Lampe, un omo di Juan Chabaya “Padu” Lampe, a bira Hoofd di e scol mas o menos tempo cu Prinses Juliana a nace na 1909. Sr. Lampe, un ferviente admirador di Oranjehuis, lo a uza su posicion como cabesante pa convence gobierno colonial pa nombra su scol pa Prinses Juliana. Den su bida Meneer Lampe a skirbi hopi poesia cu el a dedica na miembronan di Oranjehuis.


Di L.O. pa U.L.O.
No tin documentacion di e aña cu Julianaschool a bira U.L.O. (Uitgebreide Lager Onderwijs), pero tin evidencia circumstancial cu ta na aña 1920 a cuminsa duna les den 7° klas. L.O ta consisti di 6 klas, mientras cu ULO tin 8 klas. E prome menciono di un mucha cu a caba 8 aña y haya su “getuigschrift” (nan no tabata duna diploma pa ULO e temp ey) ta na 1921. E muchanan cu tabata den 6de klas na 1919 a drenta 7° klas na 1920 y gradua na 1921. E cambionan structural describi aki bou tambe ta duna credibilidad na e fechanan aki.


Cambionan structural.
E edificio cu a bira Julianaschool a pasa door di varios metamorphoses prome cu el a yega na ser Prinses Margrietschool. Segun e cantidad di muchanan tabata crece e scol tambe tabata crece. Tambe dia cu Julianaschool a bay di LO pa ULO e mester a agrega mas lokal. E potret tuma na 1907 ta mustra un edificio cu un lokaal grandi padilanti (banda di Wilhelminastraat) y un chikito patras di dje. Esaki tabata suficiente pa Julianaschool cu menos di 100 studiante y ainda tabata LO. E otro potret, saca despues di 1922, ta mustra cu dos lokaal a wordo conecta banda di zuid di e lokaal chikito cu a desaparse meimei di e edificio. E ampliamento aki lo mester a bira necesario tempo cu Juliana School a bira ULO na 1920. E espacio meimei pa hopi aña tabata e speelplaats. Un curiosidad den e area aki tabata un purun enorme for di cual nos tabata bebe awa. E tempo ey no tabatin watercooler, pero e awa di purun tabata semper fresco. Eventualmente, cu crecemento di cantidad di alumno, e cura patras a wordo extendi pa sirbi di speelplaats. Mas o menos na añanan 1938-39 dos lokaal a wordo construi riba e speelplaats pa ubica e dos klasnan di MULO te dia e scol nobo a bin cla.

Ta bin un Julianaschool nobo
Na aña 1939 ya autoridadnan encarga cu educacion publico na Aruba a realiza cu e edificio na Wilhelminastraat a bira mucho chikito y no tabata satisface e necesidadnan di Julianaschool. Openbare Werken a cuminsa prepara plannan pa construi e scol riba Klip. Entretanto, enseñanza a haya cooperacion di Cuerpo di Polis y di Mariniers pa un espacio patras di e Marinierskazerne cu tabata keda na Havenstraat. E espacio tabata habri riba Schelpstraat y tabata wordo usa como Cantine. El a wordo parti den dos pa 5° y 6° klas por keda ubica eynan te cu e scol nobo bin cla. Mi ruman Nel a pasa un aña den un di e klasnan aki. Dia 22 di Juni di 1942 e edificio riba Klip na skina di George Madurostraat y Julianastraat a keda inaugura oficialmente y e cortina a baha pa semper riba Julianaschool den Wilhelminastraat.

Di ULO pa MULO.
Julianaschool a bira MULO Januari di 1938. MULO (Meer Uitgebreide Lager Onderwijs) di 10 klas tabata e sucesor di ULO, (Uitgebreide Lager Onderwijs) di 8 klas. MULO na Aruba a bira un necesidad cu mester a wordo atendi hopi prome. Na Corsou ya nan a implementa e pakete nobo. Un di e voznan fuerte pa bin cu MULO na Aruba tabata di Sr. Gustaf Kuiperi, redactor di e semanal La Verdad y un miembro fundador di Club Rotario di Aruba. Sr. Kuiperi a biba p’afo di Aruba hopi aña y ora el a bolbe el a nota cu progreso di Aruba lo keda stagna si no amplia educacion. Tambe tabatin caso di ambtenaarnan colonial cu tabata nenga di bin Aruba pasobra ta educacion di ocho klas so tabatin pa nan yiunan. Na aña 1937 e decision a cay. Julianaschool ta cuminsa pakete di MULO na 1939 y e prome examen lo tuma luga na 1940. Ami a drenta 1° klas di Julianaschool na Wilhelminastraat na Januari 1938. E tempo ey e aña escolar tabata di Januari pa December.

AMS na Corsou
Na Corsou tambe tabatin un movimento pa extende educacion ya cu e nubianan di guera na Europa tabata indica cu lo bira masha dificil pa muchanan Antiyano bay studia na Hulanda. No ta casualidad cu Rotary Club International di Corsou a haci e movimento aki su proyecto comunitario na 1938 y a forma un comite cu a logra convence gobierno colonial pa extende su scol secundario pa cinco klas. E scol aki a habri su portanan na aña 1941 y asina e graduadonan di Julianaschool por a sigui nan estudio avansa na 1942 na Algemene Middelbare School (AMS) na Corsou cu tabata ubica den un edificio cu prome tabata Wilhelminaschool na Punda. Eventualmente AMS a bira Peter Stuyvesant College. Den e prome grupo cu a bay di Julianaschool tabata Oscar Henriquez cu tabata entre promenan cu a logra nan MULO-B diploma na 1942.

E conversion pa MULO a exigi hopi cambio
No solamente a agrega dos klas (9° y 10°), pero e pakete MULO tabata inclui vaknan nobo y mucho mas avansa. E tabata rekiri docentenan cu mas preparacion cu un 2de Klas diploma. Y asina, despues di ta Hoofd di Julianaschool pa mas di 25 aña, Meneer Lampe mester a bay duna les na Prins Bernhard School (ULO) na San Nicolas pa haci luga pa Meneer Albert H. van As cu a bin di Hulanda via Corsou. E cambio aki no a haya un bon recepcion den comunidad. Hopi mayor a protesta pasobra nan tabata admira con Meneer Lampe semper a percura bon pa su studiantenan. E tabata un maestro stricto cu a siña e muchanan disciplina. Pero asina mes nada a wordo organisa pa e studiantenan por a despedi di Mr. Lampe.

 

Despedida oficial
Segun e Notulen Boek di School Vergaderingen, December 15, 1937 tabatin e ultimo reunion di directiva di Julianaschool cu Mr. Lampe a presidi. Tabatin presente algun di e maestronan y tambe Gezaghebber Wagemaker cu a bin pa tuma despedida oficial. El a gradici Mr. Lampe pa su mas di un cuarto di siglo di “glansrijk succes op onderwijsgebied”. Mr. Gehrels a expresa su aprecio pa e manera Mr. Lampe tabata mantene un bon relacion cu y entre su personal. Na final, ademas di palabranan di gradicimento na su coleganan, Mr. Lampe a mustra resentimento comentando cu MULO lo tin e mes resultado cu excepcion di idioma Frances y Aleman cu lo enrikese e programa. Juffrouw Taïta Oduber, un icono na Julianaschool pa hopi aña, tampoco por a keda den su posicion. Mi por imaginami e teribel trauma personal cu e cambionan aki a causa na tur cu a bira victima di e progreso den educacion di Aruba.
Cuater aña den tres. Pa e muchanan di 8° klas na aña 1938, e cambio pa MULO a trece un reto hopi dificil. Algun di e vaknan di MULO normalmente ta cuminsa den 7de klasy sigui pa 4 aña te den 10de klas. Pa nan por ta cla pa pasa examen na 1940, e grupo mester a completa trabou di 4 aña den apenas 2 aña. Pa duna un ehempel, na MULO lesnan di idioma Frances ta cuminsa den 7° klas, asina ta cu e grupo aki a perde dos aña di un vak completamente nobo na Aruba. Pero e grupo chikito aki a acepta e reto y nan a logra caba scol cu “broche de oro”.
Cuminsando na Januari 1931 usando griffel pa scirbi riba lei, dia 14 di december di 1940 tur ocho a slaag y nan a haya e prome diplomanan di MULO na Aruba. Nan tabata Ellen Raven (Croes), Lydia Ponson (van Romondt), Erna Ponson (Oehlers), Shirley Harms, Carol Leon, Ersilia “Chia” Gonzales (Odor), Alfonso Mirep y August “Tico” Kuiperi. John Croes, jiu di e conocido “To Sapaté” di John G. Emanstraat tambe tabata pertenece den e grupo, pero pa via di malesa na ultimo momento e no por a pasa examen.

Aña escolar abrevia
Te cu 1940 aña escolar tabata di Januari te December. Na 1941 el a wordo cambia pa Augustus te Juni. Asina e muchanan cu a cuminsa aña escolar na Januari a haya les dos kwartaal so e aña ey. Mr. Hoekstra cu tabata kier introduci e pakete MULO-B mas pronto posibel a boga pa cuminsa e programa na 1941 mes. Den e School Vergadering di December 1940 cu Inspecteur Goslinga y Gezaghebber Wagemaker a asisti (pa e prome graduacion di MULO na Aruba), Mr. Hoekstra a pidi permiso pa extende e oranan pa Wiskunde y Natuurkunde, pero Goslinga a veto e idea. Esaki a haci cu e prome diplomanan di MULO-B na Julianaschool a wordo entrega te na Juni 1942.

Diversidad di graduadonan
E prome grupo cu a logra nan MULO diploma na 1940 tabata un refleho di e diversidad di pueblo di Aruba. Cu excepcion di e rumannan Ponson, tur di e grupo tabatin sea tata of mama stranhero; Venezolano, Colombiano of Americano. Shirley Harms a nace na Merca. Den e grupo tabatin catolico, protestant y hudiu . Probablemente como cu Guera Mundial a cuminsa na Europa y Peter Stuyvesant College na Corsou no a habri ainda, ningun di grupo a bay afo sigui studia. Carole a bay Merca pa tuma les di secretario y despues a bolbe y traha pa e Commanding Officer di ehercito Mericano staciona na Aruba durante II Guera Mundial.
Algun di e otronan a desaroya nan mes aki mes. Cu casi mil programa di “Showtime” y su otro programa “Ripiti y Gana”, Tico Kuiperi a bira e presentado di television mas conoci y popular di Aruba. Tico tambe a transmiti weganan di baseball na radio durante casi 30 aña. Alfonso Mirep a bay traha cu su tata y eventualmente a tuma rienda di e negoshi La Venezolana. Lydia Ponson tabata man drechi di cuater diferente notario y probablemente tabata suficiente prepara pa bira notario e mes. Ellen Raven a dedica su mes na hopi actividad civico y cultural. Na 2009 Ellen a cumpli 50 aña como miembro di directiva di Protestantse Christen Vrouwen Bond! Shirley Harms a bay Merca na 1944 y a join Women’s Army Corps. Na final di guera mundial el a bay Hapon cu e ehercito di ocupacion y despues el a wordo traslada pa ataché militar Mericano na Rio de Janeiro. Hopi aña despues, na edad di mas di 50 aña, Shirley a obtene su Bachelors Degree na Universidad di
Connecticut den Literatura Ingles. Di e ocho cu a gradua casi 80 aña pasa, cinco a pasa pa Scol Eterno: Chia Gonzales, Tico Kuiperi, ShirleyHarms, Lydia Ponson y Carol Leon. Na 2018, Alfonso Mirep, Ellen Croes-Raven (na Aruba) y Erna Oehlers-Ponson (na Hulanda) ta e unico sobrevivientenan di e klas di 1940.
Welkomst Lied. Algun aña Julianaschool tabata tene un of dos “bonte avond” cu canto y baile di e studiantenan na Teatro Rialto. Ora cu e cortina bay laira, esnan presente tabata wordo saluda cu e cantica di bonbini di e scol. Cuminsando cu gruponan di 5° y 6° klas cu stem fini y terminando cu e bosnan casi grof di e studiantenan di e ultimo dos klasnan, e cantica a bira masha popular. Ami a trata di verigua ta ken a compon’e pero mi no a logra, pero mi ta kere cu ta Mr. Gehrels cu tabata e maestro di canto pa varios aña.
Welkomst lied Juliana School
Gezongen door klas 5 en 6.
Wij zijn nog jong wij zijn nog klein
Wij brengen U wat zonneschijn.
Gezongen door klas 7 en 8
Ook wij doen mee, wees maar niet bang.
Wij brengen U het feest op gang.
Gezongen door klas 9 en 10
Zonder ons waart Gij niet tevree.
Vooruit dan maar wij doen ook mee.
Gezongen door allemaal samen
Welkom, welkom wij roepen ‘t U,
hier allemaal in deze zaal.
Wij wensen U veel pret en jool,
de JULIANA SCHOOL.

Gradicimento
E articulo aki ta un adapcion di un cu mi a skirbi 10 aña pasa. Mi ta gradici e siguiente personanan cu di un forma of otro a yuda mi cu e storia original na 2008: Lydia Ponson (van Romondt), Ellen Raven (Croes) y Alfonso Mirep di e graduadonan di 1940; Calixto Gonzales, ruman di Chia cu tambe a gradua e aña ey; Oscar Henriquez di e klas di 1941/42; Michael Kuiperi (klas di 1943); Sr. Harold Pereira, ex-Hoofd di Julianaschool, Sra. Yvonne Webb-Kock di Monumentenburo y Sr. Rudy de Cuba di Archivo Nacional di Aruba; y last, but not least, Helena der Meer (Croes), mi compañero di e grupo cu a gradua (MULO-B) na 1947.
Pa e edicion aki, mi kier gradici adicionalmente Bobby Chemaly cu a yuda mi haya e potret di “Tico”Kuiperi; Roy Maduro pa su colaboracion pa mi ahaya e foto di Carole Leon, Esther Croes cu a dunami varios potret di su mama Ellen pa mi scoge, y por fin, Doris van Romondt kende a logra haya foto di su mama Lydia y su tia Erna. E foto di Shirley a aparece den e version di 2008 y ta di e archivo di famia Harms. Sra. Gladys Kock a duna mi e potret di su tanta “Chia” Gonzales;
Proposicion.
Algun tempo pasa alumnonan di Juliana School kier a conmemora un aniversario, pero como ningun fecha den historia di e scol por a wordo confirma e tempo ey e celebracion no a tuma luga. Awor nos sa sigur cu “Scol di Gobierno” a habri 5 di maart 1888. Pakiko nos no ta postula e fecha ey pa conmemora aniversario di Julianaschool? No ta porta cu e scol no a haya e nomber oficial te algun decada despues! Por lo menos nos sa cu nunca e tabatin un otro nomber. Julianaschool no ta un derivativo ni yiu di Scol di Gobierno, Juliana School tabata e Scol di Gobierno. Laga nos celebra 130 aña di Juliana School prome cu e aña 2018 caba!

Manda bo comentarionan pa [email protected]

Comments

comments

C: Heineken
new india