“Ta di lamenta, cu personanan cu no ta den e posicion ni ta na altura di tur loke ta pasa, ta sali duna comentarionan, cu unicamente ta trece sensacion inecesacio pa nos scol.”
E cabesante di Juliana School, Sra. Paula Paula – Croes, como e unico persona cu por papia den nomber di e scol aki, a declara, cu den luna di Juli ultimo, durante un bishita cu representante di buro di Minister, el a splica cu den pasado durante un bishita di DOW a menciona cu e situacion di e gymzaal y e 2 klas nan pega na esaki no ta esun di mas optimal. E comentario aki tabata algo nobo, debi cu tur hende sa cu Juliana College ta riba e lista pa ricibi un renovacion completo, pero no cu a wordo menciona cu e ta den un situacion cu ta trece peliger pa esnan cu ta diariamente na e scol. Mesora a tuma accion, y hunto cu DOW a bolbe haci un opname completo di e scol, pa asina aki por a ricibi un advies di DOW. “Continuamente mi a keda informa di cada stap cu a wordo tuma pa nos scol. Si no ta di parti di DOW, ta cu Directie Onderwijs of di parti di buro di Minister”.
2 siman pasa e advies a drenta cerca buro di Minister y mes ora e contact a wordo haci, reunion nan a tuma luga na Dienst Publieke Scholen (DPS), caminda tur partido a wordo informa di e situacion pero na e mes un momento, nan a traha pro-actief y a presenta un plan van aanpak mes ora pa e problema cu a surgi. Algo cu Juliana School a admira masha hopi mes ya cu esaki ta trece cune cu por verhuis full e scol den herfstvakantie nos dilanti.” Tambe Sra. Paula a informa cu no unicamente a presenta e plan van aanpak pa verhuis e scol, sino tambe a informa mes ora cu ta haciendo tur e preparacion busca fondo adicional pa por drecha mas scol. No unicamente Juliana School sino 6 scol en total.
“Mi ta bolbe enfatisa, ta berdad cu no ta un noticia nobo cu nos scol mester a ricibi un renovacion di basta tempo caba, pero nos mester ta realistico y wak e necesidad y prioridad di cada scol. Si mi tuma nota di e scol nan cu a wordo haci den e ultimo 3 añanan aki, cual ta basta, mi mester ta di acuerdo cu tur tabata den fase di necesidad urgente. Awo aki, como cabesante di Juliana School, mi tambe ta bisa cu nos ta den e mes un necesidad aki y no por warda mas pero na e mes un momento mi ta completamente satisfecho y contento cu e proceso con esaki a bay y cu e planes nan pa renoba e scol completo”, Sra. Paula ta termina
Entrante dialuna 10 October 2016 Juliana College lo cuminsa na localidad nobo na Paradera (Britania), caminda e cabesante hunto cu algun docente a bishita e localidad y ta sumamente contento cu esaki.