“Unico cos cu nos kier ta e garantia di cu su bida lo no core peliger”, presidente di Ecuador, Lenin Moreno, a afirma.
E presidente di Ecuador, Lenin Moreno, a admiti cu e fundado di WikiLeaks, Julian Assange, lo termina ta bandona e Embahada di Ecuador.
“Jamas mi tabata di acuerdo cu e actividad cu Sr. Assange ta realisa, nunca mi tabata di acuerdo cu e intervencionnan den emailnan priva di hende pa haya informacion, pa mas balioso cu e por ta pa trece na lus di dia actonan indeseabel di gobierno of di personanan”, e mandatario a bisa. “Esey no ta e manera. Tin maneranan corecto y legal pa haci esaki”, el a agrega.
Sin embargo, gobierno anterior si tabata considera cu e bida di Assange tabata core peliger, Moreno a bisa. El a agrega cu ‘na Ecuador no ta existi pena di morto”. Moreno ta sigui bisa cu “ta p’esey e unico cu nos kier ta e garantia di cu su bida lo no core peliger”, Moreno a subraya.
“Nos ta deliberando esaki cu e abogadonan di Sr. Assange y cu gobierno Britanico”, e mandatario a señala. “E unico persona cu nunca mi a papia cun’e ta Sr. Assange mes”, el a bisa.
Moreno a afirma na final di Mei cu Assange lo por sigui “gosa di su derecho na asilo”, mientras cu e cumpli cu e rekisitonan. Den un entrevista cu Deutsche Welle, el a recorda cu Assange tin prohibicion di “papia over di politica y interveni den paisnan amigo”. Ora cu a puntr’e si Assange lo no tabata cumpli cu e condicionnan, el a responde: “Nos lo tuma e decision na e momento ey”.