Otro siman, cuminsando for di dia 24 di October, pa e resto di siman te cu diabierna, FADA lo tin varios actividad, relaciona cu siman di Sinta Cora.
E ta splica cu e aña aki ta e lema lo ta YOLO “Be Drug Free”. E nomber YOLO ta conoci bao di hubentud, pero a bin cu un toke mas positivo den e nomber aki caminda cu un biaha bo ta biba berdad, pesey bo tin cu bib’e liber di droga. E siman di sinta cora mes ta algo cu FADA ta haci pa hopi aña caba. El a cuminsa na Merca caminda cu tin un funcionario di DEA cu ta e departamento di Droga Mericano, tabata tin un operacion na Mexico y e cartelnan a gar’e y a asesine. Door di esaki Merca a bin cu full un siman caminda cu ta dedica diferente topico cu tin di haber cu droga y adiccion. Ta dun’e un tiki mas exposure y Fada sigur ta tuma e oportunidad pa e siman aki y tin e siman di sinta cora cual ta extende cu un siman di bisti na locura. Bisti na locura ta un campaña cu tin cuater aña caba di existencia y tin hopi popularidad. Lo bay sigui cune y lo bin cu algo extra e aña aki pa acerca famia pa participa den e evento aki.
Sprock a sigui splica cu pa e siman aki lo bay extende e campaña di concientisacion. Nan lo bay radio, articulonan lo sali den corant y otro medionan. Tambe lo bay diferente empresa, diferente hotel cu ta bishitando y tambe ta bay tin diferente proyecto nobo, vooral cu tin di haber cu alcohol. A ripara cu door di hopi investigacion cu a haci na Aruba mes, ta mustra cu tin un uzo hopi grandi di alcohol. Tabata sa esey caba, pero awo tin cifra. Comision Zinia y comision Veilig Verkeer, ta bay cuminsa cu un campaña grandi tocante prevencion, concientisacion di core auto bao di influencia di alcohol. A ripara den medionan di prensa cu e uzo di alcohol den fin di siman pa hendenan cu ta core auto tambe, ta hopi halto. Esaki kier bay pak’e aan cu e campaña cu ta bay tin y tambe pa e muchanan chikito, tin un proyecto cu lo bay cuminsa otro aña caminda cu ta bay bishita e scolnan basico, caminda cu lo bay educa e muchanan con pa nan keda leu di e uzo di alcohol, pasobra tin cu cuminsa na jong. Tin un grupo di hendenan adulto, cu ta hopi dificil pa nan bay stop di uza alcohol, Sprock a splica.