CARACAS, Venezuela – Parlamento Venezolano, controla pa oposicion, dialuna a autorisa e hefe di e organo, Juan Guaido, kende na januari ultimo a asumi funcionnan di presidente encarga di Venezuela, a declara un “estado di emergencia nacional” debi na e “calamidad” cu e pais ta pasando aden pa e blackout cu ya caba ta den su di cuater dia.
Diputadonan di e partidonan di oposicion a aproba di forma unanime, “un estado di excepcion” y cual lo dura 30 dia.
For di diahuebs pasa Venezuela ta sufriendo un fayo den e servicio electrico cu ta afecta gran parti di e pais, y cu según gobierno di Nicolas Maduro, a tuma luga “despues di un atake cibernetico” riba e central hidroelectrico di Guri, cu ta abastece casi 70% di e teritorio.
E blackout ta provocando desesperacion mei mei di e poblacion Venezolano, tanto cu por a wak imagennan dramatico na momento cu’n mama ta hiba e cadaver di su yiu pa un mortuario.