Durante e evento di Mike Eman den Marriott Hotel Juan David Yrausquin a splica cu Mike Eman y su persona a diferencia di opinion na hopi ocasion; algun biaha tabata publico, otro den Parlamento y tambe porta cera. Tabatin diferencia di opinion, prome cu el a bira miembro di AVP y te dia di awe. Pero hustamente esaki ta loke a permiti Yrausquin conoce Eman miho. Na prome semper a respeta otro su opinion y tabata compronde diferencia di opinion, na final di dia, por yuda wak padilanti y logra e metanan paso tin biaha diferencia di opinion ta yuda bo hiba bo pais mas padilanti.
“Mi a siña respeta y aprecia su vision pa nos pais. Mi a siña aprecia su firmeza den ehecucion di e vision aki. Mike y ami lo por keda diferencia di opinion riba diferente tema, pero e pilar y fundamento di su vision, pa esey mi ta y lo semper keda para banda di dje,” Yrausquin a afirma.
Eman su vision, na opinion di Yrausquin, ta basa riba cuater pilar. 1 Sostene esnan di menos recurso den cada ocasion; 2. Crea espacionan publico di calidad y mehora infrastructura di nos pais y den tur bario; 3. Crea consenso den tur aspecto di gobernacion y amplia e balor agrega di Reino Hulandes pa Aruba; y 4. Fortifica y diversifica economia di Aruba. “Den un zin, mi ta kere nos por resumi’e como cu enfoke ta riba pueblo y pais,” asina Minister Plenipotenciario a expresa.
Pa e proximo cuater añanan Yrausquin ta wak cu ta bon pa consolida e esfuerzonan di e ultimo ocho añanan y pone e cuater pilarnan aki riba un base firme pa keda como un ‘blueprint’ pa futuro gobernacion. Como Minister Plenipotenciario el a bisa cu e ta sinti un apoyo inmenso di parti di Hulanda pa un gobernacion di Mike Eman continua den e 4 añanan nos dilanti.
Mas specifico, ta kere cu e intencion hinca den e Programa di Partido “Aruba Padilanti: 2017-2021” pa cu introduccion di un huurtoeslag ta bay crea un aspecto diferente y un sosten fuerte pa esnan cu mester di esaki. Lo elimina e lista di espera cu tin na FCCA pa cas paso bo ta duna e apoyo financiero na e persona y e no ta mara na e cas unda cu bo ta biba y basa riba e necesidad cu e persona tin.
Pa finalisa Juan David Yrausquin a bisa: “Dia 22 di september nos ta bayendo urnanan electoral y e pregunta cu nos tin cu haci nos mes ta den ki tipo di Aruba nos kier lanta cu ne dia 23 di september. Boso kier lanta den un pais lidera pa Mike Eman, cu ta lanta dia aden y dia afo cu e sosten di su kerido esposa pa realisa e visionnan aki? Of nos kier bay bek na e liderazgo di conflicto, di stof y di desempleo cu tabata reina prome cu esaki? Dia 23 di september mi kier lanta den un pais caminda Mike Eman ta na timon di nos pais.”