Parlamentario mr. Juan Ady Thijsen a tuma nota di comentario di Raad van Advies relaciona cu e defamacion door di Ministro Otmar Oduber den direcion di un miembro di Raad van Advies durante tratamento di e concepto di ley pa regula accomodacionnan all inclusive den Parlamento di Aruba dia 24 di Augustus ultimo. Conseho Consultativo (Raad van Advies) ta considera cu e declaracionnan aki no solamente ta un insulto pa e miembro concerni, pero tambe pa henter e Conseho mirando cu e ta un insulto riba e capacidad, independencia y imparcialidad di tur miembro. Segun Raad van Advies su tarea constitucional, cu ta encera entre otro mira conceptonan di ley di un forma critico, no ta facil pero ta di suma importancia den e estado di derecho democratico. Conseho Consultativo ta conciente cu no ta tur hende por anda cu critica y tambe cu no ta tur hende sa e funcion, posicion y importancia di Conseho Consultativo. Di personanan cu no tin di haber cu gobernacion por spera esaki posiblemente y expresionnan asina, aunke con inhusto y incorecto nan por ta, mester wordo laga pa locual nan ta: afirmacionnan infunda y robes. Pero segun Raad van Advies ta expresionnan asina di gobernantenan ta inacceptabel. Parlamentario mr. Juan Ady Thijsen ta condena e actuacion bochornoso aki di Ministro di Turismo Otmar Oduber y ta sostene Raad van Advies den su comentario. Segun Parlamentario mr. Juan Ady Thijsen full e comportacion di Ministro Otmar Oduber den e reunion di all inclusive tabata uno bergonsoso y bou tur nivel. Den e mesun reunion aki Otmar Oduber a ataca AHATA y a acusa AHATA y su miembronan di a soborna tanto Mike Eman y su Gabinete como Aruba Gastronomic Associaton. Segun Parlamentario mr. Juan Ady Thijsen e insulto di Otmar Oduber den direcion di Raad van Advies ta un otro prueba cu Gabinetenan di Mike Eman ta viola principionan di bon gobernacion.
- Latest
