Dialuna dia 30 di Mei a tuma luga e prome Pan Am Series na Forth Worth Texas unda cu Joshua Klaber y Jourde Klabér a participa den nan prome evento G2 pa aña 2022 cu e reglamentonan nobo cu a wordo aplica na e evento. Joshua y Jourde Klaber a wordo guia pa nos atleta Olimpico Monica Pimentel. Joshua Klaber (17 aña) a bringa den adulto categoria -58 kilo y a sali contra di e atleta Anas Sghir for di Canada. Joshua Klabér no tabata na su bon banda contra di Anas Sghir kende a cuminsa pone Joshua Klaber bou presion den e prome secondenan y Joshua Klaber a cuminsa bringa bek. E score despues di 2 minuut a termina 11-6 pa Anas Sghir.
Den di dos rond Anas Sghir a bin mas fuerte ariba Joshua y e score a termina 16-4 pa Anas Sghir y e pelea a termina. Cu e reglamentonan nobo ta cu si bo gana dos di e tres rond e pelea ta caba. Jourde Klabér cu a bringa den e categoria di adulto -63 kilo a sali contra di e legendario Damian Villa di Merca. Damian Villa ta un di e atletanan mas mira den e region Latino America pa su spectacular tecnicanan. Jourde Klaber a duna mas di su banda unda cu for di e prome rond Jourde Klaber a haña un lesion na su pia drechi cu a frena Jourde Klaber un tiki y cu hopi esfuerso a logra di gana tur dos rond for di Damian Villa. Jourde Klaber a bringa su di dos pelea contra otro legendario Luis Pie for di Santo Domingo. Jourde Klaber a trata pa bay contra di Luis Pie pero cu un pia y contra un legendario no a yega mucho leu. Luis Pie a vence tur dos rond contra di Jourde Klaber y Jourde Klaber a keda na di 3er luga.
