Aruba Ports Authority ta trahando riba unp lan pa organisa servicionan turistico na porta di waf di Playa.
Director di e entidad, Jossy Figaroa, a comenta cu continuamente nan tin combersacionnan cu e stakeholdernan, esta imigracion, cu Douane y tur e otro hendenan y touroperatornan, taxistanan y ta papiando tambe cu Minister. Un di e problemanan cu tin ta cu e tourbusnan cu ta para pafo. Encuanto di esey, a sinta cu minister algun siman pasa. Ta para hopi riba e problematica aki y tin un plan pa net parib a di e tanki di awa, crea un luga pa para e tourbusnan cu ta bin para pafo. E ta full planea. A papia e siman aki atrobe cu e persona cu ta encarga pa prepar’e y a comenta cu prome cu e fin di siman aki lo haya informacion y ta spera cu pronto por ehecuta e proyecto ey. E ta bay mas bien kita e bruhamento, pa ora cu e turista sali y tin yen di bus den otro y por haci’e miho.
Ultimo añanan e ta bayendo miho cu antes, mirando cu awo polis ta envolvi, unda cu ta haya asina hopi hende para dilanti porta cu ta stroba e turistanan. E turistanan ta haye como molester. No por kita hende pa atrae un turista pa bay den su bus, pero nan ta haya esey como molester.
Ora cu nan drenta bek barco, nan puntra nan con a bay, y nan ta bisa cu nan a haya un molester y esey ta skirbi riba dje. Loke ta purba pa ora puntra turistanan con a bay, nan ta duna un comentario positivo, sino ta keda haya cu e barconan ta stop di sigui bin Aruba.
Tin un terminal paden y den dje tin diferente booth. Tin pensa pa cambia pa buta hende mas pafo. Loke ta bay construi awor aki, ta kiosco. Tin di warda pa wak con esey ta bay keda, con e turistanan ta hay’e, pa bin cun’e. No ta e intension pa yena yen di kiosco pa competi cu caya grandi. E ta mas bien pa ora cu e turistanan ta bayendo, toch nan por cumpra cualkier cos of keda mas largo.
Figaroa a sigui splica e liña crucero, ora nan scoge Aruba, na no ta scoge pasobra cu turistanan ta haya Aruba ta bon, pero nan ta wak cuanto placa nan ta gana. Nan kier haya tur e placa tu e touroperatornan. Awor aki ta wak pa coopera cu e touroperatornan na Aruba y esunnan cu nan por bende riba barco. Esunnan cu nan ta bende riba barco, nan ta haya un parti grandi como pago. E parti grandi ta keda riba e liña crucero, segun Figaroa.