Despues di 2016, St. Aloysius School a haya un poco atencion. Pero awe cos ta cada dia mas malo pa cual e keho di mayornan ta hopi. Nan ta disgusta. Josette Daal, directora di SKOA a splica instancianan ta na altura di e scol.
Na 2006, e scol a haya mantencion pero masha limita. Tin situacionnan caminda cu ta ricibi muchanan, cu no ta responsabel pa duna les asina eynan, segun Daal.
E scol tin stof y klasnan cu no tin airco, ta sufri di dje. Tin maestro cu ta kita for di scol pasobra nan no por cu e stof. E cabesante mes por wordo uza como ehempel. E tin problema cu wowo pa motibo di stof. Mester busca un solucion. E edificio mes mester di mantencion y no ta cos cu SKOA no ta para pe. SKOA a manda tur sorto di informacion di e situacion di e scol y awor aki ta bolbe habri un aña escolar, ricibi e muchanan den scol, cu no ta adecua awor aki.
A traha un rapport pa mustra henter e situacion aki, segun Daal. Aña pasa atrobe a entrega e rapport cu ta mustra tur e problemanan aki. A bin cinco pa seis biaha bin haci opname, pero e ta keda te eynan. E cos fastioso ta cu mayornan no kier trece nan yiunan den un situacion asina aki. Tur mayor kier pa nan yiu drenta den un scol cu ta agradabel, cu ta netjes, cu por mantene. E aña escolar ta habri, mayornan ta bira mas critico y nan ta keha riba e situacion di e scol aki tambe.
E procedura ta pa bay pa un mantencion grandi, cu tur fin di aña e instancia cu kier wordo subsidia ta traha un wenselijkheid begroting, ta pone ministerio di enseñansa na altura di e situacion di diferente scol y ta haci peticion pa e mantencion grandi, etc. Den e caso di St. Aloysius tin basta aña caba cu a manda verslag, saca potret, manda e begroting. Nan ta bin wak, segun Daal, pero nada no ta wordo haci.