Colegio Frere Bonifacius ta keda un problema te ora dicidi kico ta bay haci cun’e segun directora di SKOA, Josette Daal.
El a splica cu minister Dowers a haci un esfuerso pa mesun cos cu SKOA, a haci aña pasa, hunto cu City Inspector, saca e adictonan ambulante for di e situacion cu nan ta for di e edificio. Aña pasa a laga cera full e luga pa evita cu ta drenta den e edificio. A laga haci’e full limpi cu cooperacion di City Inspector. Ta un situacion tiki dificil, cu di un manera of otro nan sa toch pa drenta den e edificio. E luna cu a pasa obispo Secco tabata na Aruba, caminda hunto cu SKOA a haci un recorido den e scolnan di SKOA, caminda cu e tin un bon bista riba e edificio en particular.
E proceso ta andando. Daal ta spera cu den un tempo basta cortico por tuma un decision pa e edificio.
Josette Daal a bisa cu e procesonan di bende of benta abao, etc. a para. Hunto cu obispado tin cu bay wak ki decision ta bay wordo tuma. Basha abao tabata un di e opcionnan y trah’e di nobo. Bende ta claro. Obispo a bisa den un charla anterior cu minister, cu nan no ta bende. Awor aki e mester ta sea bash’e abao y trah’e di nobo. Pa renoba a sinta cu expertonan di DOW, caminda cu nan a bisa cu e no ta rendabel pa renob’e. Un di e opcionnan cu a keda ta, ta bash’e abao y trah’e di nobo. A haci un apelacion riba obispo Secco pa e aña cu habri pa laga yega na un acuerdo pa wak kico e ta bira.