Ya ta di tres aña cu PWC Aruba ta organisa e proyecto Earn Your Future. E proyecto aki ta encera cu e expertonan financiero di PwC Aruba boluntariamente ta duna hobennan di 5de y 6de klas basischool les riba diferente aspecto financiero manera entre otro con pa spaar y con pa maneha un budget.
Directora di SKOA Josette Daal ta contento cu e iniciativa aki. E ta kere cu ta importante pa hobennan siña con pa maneha nan placa. Den veld a sondea con e muchanan a reacciona riba e proyecto aki y e proyecto aki ta haci e muchanan mas conciente y ta pone cu nan ta compronde miho ora cu nan mayornan no por dunanan tur cos cu nan kier. Ora a papia cu e muchanan nan a bisa cu nan a siña di e ‘hendenan cu no ta juffrouw y meneer di school” pero cu a bin school y educanan riba e aspecto aki.
Josette Daal a sigui splica cu di otro banda e schoolnan mes ta uza e material aki tambe pa sigui educa muchanan con pa anda cu nan placa, esta ‘hoe met geld om te gaan’. E ta un forma agradabel pa siña e muchanan riba finansa y economia y di e forma aki ta spera cu e informacion ta yega serca e mayornan tambe por medio di nan yiunan.
SKOA ta aprecia cu nan ta haya e informacion aki di forma boluntario y asina ta mustra tambe cu companianan por haci un aporte na educacion di nos hobennan. Comunidad mester aporta mas na educa muchanan y duna mayornan informacion.