Joselin Croes a confirma cu berdad el a wordo acerca pa varios partido politico, y a tuma e decision pa ta un candidato nobo y pronto e lo anuncia cual partido e lo forma parti di dje.
Pa a trece dilanti un poco di ken Joselin Croes ta:
Joselin Croes ta yiu di difunto Theresita (Sita) Croes y Arturo (Tuyo) Croes. El a biba henter su hubentud na Santa Cruz, y a bay studia na Hulanda na aña 1988, caminda el a termina su Bachelor’s Degree den International Public Relations and Management na Den Haag. Despues cu Joselin Croes a bolbe Aruba, el a traha na Central Bureau Statistiek pa dos aña y despues 11 aña na Fundacion Lotto pa Deporte como directora di benta y mercadeo. Banda di su trabou Joselin a bay studia ley na Universidad di Aruba y el a gradua cum laude. Desde 2010 Joselin ta eherciendo su profesion como abogado na Aruba. Joselin ta casa y e tin dos yiu adolescente y ta un persona sumamente activo den hopi organisacion deportivo, innovativo, social y religioso.
Joselin a drenta politica 19 aña, un edad hoben den e partido OLA.
A puntra Joselin pakico e ta bay drenta politica bek despues di tanto aña?
Joselin ta splica cu e ta sumamente preocupa cu e rumbo cu pais Aruba ta bayendo. Joselin lo kier mira un cambio no solamente den gobernacion actual di pais Aruba pero tambe e kier mira pueblo kibra cu e tradicion di solamente vota pa partidonan grandi, y mas importante aun e no kier pa nunca mas ningun partido na Aruba gana cu un mayoria absoluto cu ta conduci na tin un “stempel parlement” cu enbes di controla gobierno ta laat de boel maar waaien.
Su deseo ta pa mira un Aruba mas “vocal” y activo y votadornan critico cu ta tene nan parlamentarionan “responsabel” pa nan decisionnan. Pa hopi aña e partidonan grandi a haya chens pa goberna Aruba y awe Aruba ta den un situacion financiero sumamento delicado y espantoso di tanto placa cu gobiernonan a fia y mester paga bek. Sin papia di un AZV cu no por paga tur su debenen cu consecuencia cu e cuido di salud ta laga hopi di desea. Comercio di Aruba ta den kiebra, mayoria negoshinan ta cerando nan porta pasobra nan gastonan di empleado y belasting ta impagabel. Falta di innovacion. Enseñanza a keda pega den siglo 19, hopi educador ta demoralisa pa motibo di falta di vision, innovacion y cambionan necesario den nos enseñansa. Un pueblo cu ta wordo asota cu criminalidad y nada no ta wordo haci pa drecha e situacion. Hendenan cu ta lucha pa paga tur nan debenan tur fin di luna ya cu e placa no ta yega di caro cu bida na Aruba ta. Studiantenan cu studielening hopi halto sin trabou cu ta cuadra cu nan vision y pasion. Mientras cu gobierno no ta haciendo ningun esfuerso pa baha nan gasto e pueblo si ta wordo suta cu belastingnan ridiculamente halto (si no ta esun di mas caro na mundo), cuminda, awa, coriente y gasolin ta haltisimo y pa esnan cu a cumpra, of ta construyendo nan mesun cas, e interes riba e hypotheek ta haci’e casi imposibel pa nan por tin un calidad di bida decente y progresa.
Joselin ta di opinion cu e peliger di mas grandi pa e democracia di un pais ta ora bo parlamentarionan no ta liber pa controla e gobierno