Dia 9 di Augustus 2017 Minister di Finansas, mr. Angel Bermudez, a manda un carta pa tur hefe di tur departamento di gobierno informando nan cu entrante 1 di Juli 2017 a drenta na vigor e desicion tuma den Ministerraad dia 23 di Juni 2017 (BE-46/17) na unda a dicidi cu tur “arbeidscontractant” (entre nan tin tur e 350 coordinadornan di tur e ministernan actual) lo keda apunta como ambtenaar conforme ley di ambtenaar (LMA).
Kiermeen pa nos tur cu e pensa cu ora e gobierno aki bai cas e lo bai cu tur su 350 coordinadornan y tur su miles di empleadonan cu ta nombra via un contract, nos ta bon equiboca. Di un forma irresponsabel y no transparente gobierno a bai encontra di e ultimo recomendacion di CFT, cu a informa gobierno cu e mester baha e gastonan di e aparato gubernamental dor di baha e gastonan di personal.
E criteria segun e maneho pa apunta un contractant den “vaste dienst” ta:
Mester tin un evaluacion positivo di e candidato
E funccion mester ta aproba pa e departamento concerni
E candidato mester cumpli cu e exigencianan di LMA
E candidato mester tin un WO- of HBO- Diploma y mester a traha 1 aña cu gobierno como contractant
E candidato no mester tin un WO- of HBO Diploma y mester a traha 3 aña cu gobierno como contractant.
Kiermeen tur e coordidadornan y contractantnan cu no tin ningun estudio algun y cu a traha e ultimo 3 añanan den gobierno lo cai den vaste dienst conforme LMA. What about tur e rubianonan studia cu tin añas purbando di haya un trabou den gobierno pero no ta bin na remarca paso nan no ta color berde di AVP? . Anto despues nos ta puntra nos mes pakico nan no ta bolbe Aruba of pakico nan ta asina desapunta den nos gobernantenan.
Por wel di ta asina cu e letra nan chikito di e maneho ta bisa cu e maneho aki no ta aplicabel pa tur arbeidscontractant cu ta traha na bureau di Minister, pero nos tur sa cu den practica e gobierno aki a lanta yen di departamento nobo y a hinca tur su coordinadornan den e departamentonan aki pa asina nan por cai bou di e maneho nobo aki y asina haya un trabou fiho den gobierno.
Esaki ta hustamente e desicionan descabeya y irresponsabel cu nos mester stop. Tanten cu pueblo ta sclama cu cobransa di belasting haltisimo y CFT ta urgi gobierno pa baha su gastonan, dos luna prome cu eleccion nan ta pasa nos tur un “fastball” dor di apunta tur contractant den vaste dienst subiendo e gastonan di e aparato gubernamental cu miyones.
Dia 22 di september bisa NO na e actonan irresponsabel aki. Vota pa e cambio. Vota POR.