Papiando cu un gran grupo di hoben cu ta studiando na Hulanda y Merca Joselin ta compronde cu mayoria di nan no kier bin traha den e sector turistico. E grupo aki tin gran teror di e hecho cu Aruba ta asina vulnerabel door cu 80% di su economia ta basa riba turismo so. Nan ta preocupa cu un calamidad por haci un daño asina grandi na nos turismo cu Aruba lo no por recupera di dje y cu Aruba no tin un fall-back plan. Un economia practicamente mono-dependiente no ta sostenibel mas y door di esaki Aruba mester diversifica su economia.
Un grupo grandi di hobennan awor ta studiando por ehempel biomedical sciences. Nan ta haci research den con pa combati cierto enfermedadnan y / of bacterianan. Nan ta pensa cu gobierno mester inverti den un research center caminda lo conduci research riba un nivel societal pa reduci e stigma rond di cierto infectieziekten cu ta prevalece den e area di Caribe. Esaki lo no solamente crea cupo di empleo pa e studiantenan aki pero tambe yuda baha e nivel di infectieziekten na Aruba.
Un otro grupo ta studiando Finance & Business, nan ta kere cu Aruba mester siña di Corsou y introduci free zone businesses y cuminsa focus mas riba e tereno di financial services. Adicionalmente Aruba mester crea un ambiente cu ta mas amabel pa cu nos Young Entrepreneurs. Mester crea un plataforma cu ta hacie mas facil pa nos Young Entrepreneursnan haya acceso na financiamento y guiansa den nan proyectonan.
Un otro grupo grandi ta studiando Engineering & Technology. Nan ta bisa cu si Aruba pone su mente na dje e lo por bira como un Silicon Valley den Caribe. Aruba ta un isla dushi pa biba, lamannan bunita na unda hopi hobennan lo kier bin biba y desaroya proyecto of programanan innovativo. Tin hopi studiantenan tambe studiando Fine Arts, Aruba mester crea oportunidad pa e hobennan aki por usa nan conocemento y educa nos hobennan di Aruba den Fine Arts. Aruba tin actualmente 3 pa 4 hoben studiante cu a caba nan masters den bio marine. Aruba ta e pais ideal pa tin un bio marine center. Nos ta rondona di lama, cu yen di koraal y especie nan unico. E por bira un world bio-marine center na unda por atrea tur experto di mundo pa bin traha y crea cuponan di trabou di nivel halto pa nos hobennan. Tin hopi hoben ta studiando medicina pero ta encontra hopi contratiempo pa haya trabou aki na Aruba. Esakinan ta e motibonan primordial pakico nan no ta bolbe Aruba y Aruba ta perde di gana paso ta hustamente e hobennan aki mester di bolbe bek Aruba pa por traha y goberna nos pais den futuro.
Turismo a yega su piek y nos pueblo kier pa bin cu un paro den construccion di hotel y un paro den importacion di un gran cantidad di hendenan di afor. Aruba kier proteha esnan cu ta aki caba y brinda nan un bida di calidad halto. Mayornan di e Milenials nan tambe ta pidiendo pa crea cupo di trabou di nivel halto pa nan yiunan y esaki no ta posibel den turismo paso tur e posicionnan halto ta tuma caba.
E Plataforma e Forsa Nobo ta teniendo un Focus Group cu un grupo grandi di hoben na Hulanda lidera door di un organisacion di hobennan activo y asina cu e resultado ta cla lo anuncia esaki y hinca nan ideanan y nan plannan den nos plan di gobernacion. MESTER POR! Pone nos hobennan na prome lugar paso ta nan ta e futuro lidernan di nos pais.