Jose Luis Kock empleado di aña 2019 na Hospital

Dr. Horacio E. Oduber Hospital a topa cu algun reto aña pasa y no a logra saca nan empleado di aña 2019 manera custumber durante e fiesta di fin di aña. Pero asina mes empleadonan a pasa vota recientemente entre e diesdos empleadonan di luna y e ganador pa aña 2019 a resulta den persona di Jose Luis Kock. E ta labora como Medisch Electronicus den e departamento di ’Medisch Techniek’ na Hospital. No solamente e coleganan di e departamento di Medisch Techniek a vota p’e pero tambe coleganan di varios otro departamento a vota pe bira e empleado di aña 2019 paso e ta un colega hopi aprecia y stima.

Jose Luis Kock a duna di conoce, cu e tabata hasiendo un trabou na clinica di dialyse y su coleganan a bis’e cu tin un reunion urgente tocante ‘werkorders’. Durante e reunion el a mira hendenan drenta un tras di otro y a haya e anuncio como un sorpresa grandi.
Semper el a trata di haci su trabou bon, pero tambe trata tur hende bon y cumpli cu locual e trabou ta encera pa asina caba cun’e. Pone semper e pashent na prome luga, pasobra mester drecha e aparatonan p’e pashent por sigui haya nan tratamentonan. “Esey ta locual nos ta bringa semper p’e. Den un forma maximo pa nos aparatonan ta bon y e pashent por haya un bon tratamento,” el a duna di conoce.

Pa tur aparato nobo cu drenta nos departamento, nos mester bay un training p’e sea afo of ta haci e training na Hospital mes, pero semper mester keda ‘upgrade’. Su profesion ta un cu nunca bo ta caba di siña pues sigur interesante. Tur dia nan ta siña algo nobo pa por sigui cu e aparatonan. E motivacion di Jose Luis Kock ta cu e gusta su trabou y e kier pa un pashent ta mas comodo durante su tratamento.

“Mi ta traha hopi cu e mashinnan di dialyse. E pashentnan tin cu dura ±4 ora na e mashin y bo kier pa nan ta comodo,” Jose Luis Kock a duna di conoce. Ora di e tratamento nan no kier tende cu niun mashin a daña of kier p’e bay mas suave ainda.

Directiva, staf y tur colega di Hospital kier felicita colega Jose Luis Kock cu un reconocemento bon mereci!

 

Comments

comments