Tur anochi mi ta cambia hamber pa un sonrisa, esaki ta loke Jorge Muñoz ta bisa, un Colombiano di Perreira cu ta biba na New York ya pa mas di 30 aña caba y ta parti cuminda na personanan pober y hopi cu no tin un lugar pa biba y ta drumi riba cayanan na Queens.
E ta sali 7.00 di anochi cu cantidad di cuminda, mas di 150 boter di awa, refresco y pan y ta cuminsa parti esaki na personanan cu no tin ni sikiera luga di biba y cu hamber den New York, y ta yega cas bek pa 11.15 pm pa drumi un rato ta lanta 5.00 am pa cuminsa su dia, transporta muchanan cu’n bus escolar.
Algun di e muchanan cu sa e mision cu Jorge Muñoz un persona amabel y carismatico ta haci a conta nan mayornan y e mayornan ta yega te na su cas y ta hiba contribucion den forma di placa of cuminda mes.
Jorge Muñoz nunca a faya den mas di 10 aña cu e tin e mision aki. E unico biaha cu e no por a yega ta un anochi cu a cay hopi sneeuw y e no por a saca su pickup for di parkeerplaats e dia siguiente el a pasa bisanan cu e no por a sali, loke realmente ta preocupa Jorge Muñoz ta pa wak hendenan pasa un dia sin come. Y ta lamenta tanto cuminda cu ta ser benta afo.
Cu tur e cuminda cu ta ser benta afo na Merca den un fin di siman bo por alimenta mas di 4 miyon hende.
Jorge ta biba na Merca for di mas di 35 aña cu su mama Blanca Doris Zapata, su ruman muhe Luz Helena y su sobrino Justin cu tambe ta yuda parti cuminda.
“MI mama cu mi ruman ta prepara tur e cuminda riba stoof y den 2 forno y henter siman ta varia e cuminda.
Cu tempo a haya 2 persona mas cu ta yudanan, for di 1 pm te 4 pm, pa asina 7.00 pm mi sali parti e cuminda. Cu tempo e noble storia di Jorge Muñoz a bira conoci y dia 4 Augustus 2010 ela ricibi for di President Barrack Obama un condecoracion na Casa Blanca, e medaya “Citizens Medal”. President Obama a bisa Jorge cu e ta sorprendi y honra cu su tarea humanitario y ta consider’e un persona ehemplar.
Na momento cu e noticia a bira conoci rond mundo el a cuminsa haya e-mails y contribucion y te hasta un mucha di 8 aña a manda $25.00 di benta di bolo di chuculati.
El a wordo scogi pa e cadena di noticia CNN entre 10 finalista pa e titulo di Heroe di CNN na 2009. E titulo di Angel di Queens a ser duna na dje door di un periodista cu a admira su trabou, su propio comentario ta cu e angelnan ta den shelo y cu cada ser humano por ripiti e actonan aki cu un of dos persona, bo no mester di hopi pa por coopera. Pa Jorge mes e berdadero heroenan ta su mama y su ruman muhe.
Jorge Muñoz lo ta na Aruba dia 25 di Februari y lo duna un charla gratis na Colonia Colombiano na e Ball Room situa na De La Sallestraat# 26 banda di Don Jacinto.
E horario lo ta di 5.00 pm- 8.00pm.
Aki lo tin e oportunidad scucha y conoce mas di e labornan di Jorge Muñoz cu ta ser realisa door di e fundacion MIRA na Colombia y con esaki ta beneficia personanan cu di berdad tin mester di yudansa.