LIMA, Peru- Joran van der Sloot un biaha mas ta den spotlight di husticia Peruano. Joran cu ta sintando un castigo di 28 aña di prizon pa asesinato di e Peruano, Stephany Flores, awo ta sospechoso di un otro investigacion hudicial relaciona cu labamento di placa. Van der Sloot, hunto cu su amiga Leidy lo a desvia 350 mil euro, di placa criminal.
Algun casino online, segun fuentenan dentro di husticia Peruano, lo a haci un denuncia di estafa, pa cual a start un investigacion. E casinonan lo a perde miles door di ‘manipulacion y trampa’. Un parti di e placa cu a wordo horta lo a wordo deposita ariba e cuenta di e amiga di Joran, Leidy Figueroa. Esaki segun Ministerio Publico. Tambe lo tin un posibel di dos sospechos, un ciudadano Hulandes, cu kende Joran tabata tin contacto estrecho cun’e den pasado.
Maximo Altez, abogado di Van der Sloot, a confirma e sospecho di husticia Peruano tin ariba su cliente, pero no kier a elabora ariba esaki. Tampoco e kier a confirma si e lo defende Van der Sloot den e caso aki. Si el a bisa cu e pruebanan contra di Joran van der Sloot a wordo entrega na Corte Peruano. Husticia Peruano ta di opinion cu e amiga di Joran y mama di su yiu ta wordo sospecha di labamento di placa, pa cual e por wordo aresta.
Appartment luhoso
Figuero cu ta bin di un bario pober di Peru, awo ta bibando den un apartamento espacioso den un bario luhoso den e capital Peruano. E muhe, cu ya pa varios aña tin un relacion cu Joran van der Sloot, di cual relacion a nace un yiu, lo a paga e appartment cu placa di procedencia dudoso. Esaki ta motibo tambe pa cual husticia lo a laga pone beslag tanto ariba e cas como e auto di Leidy. Van der Sloot ta nenga di sa algo di esaki. E appartment lo a wordo paga door di Joran cu placa di su ‘sugarmommy’ Mericano, Mary Hammer, cu ta convenci di e inocencia di Joran.
Joran ta na e pais Suramericano aki sintando un castigo di prizon di 28 aña pa e asesinato di e mucha muhe Peruano, Stephany Flores. Merca ainda ta buscando su extradicion relaciona cu e desaparicion di e hoben di 18 aña, Natalee Holloway. E hoben a disparce durante un biahe pa Aruba y Van der Sloot lo ta envolvi den su desaparicion/asesinato. Tambe e ta wordo acusa di estafa y extorsion di e mayornan di Holloway.