Diabetes ta un malesa cronico cu ta hopi comun na Aruba. Presidente di fundacion Diabetico, Joos van der Kamp, ta gradici tur esfuerso di Lions Club pa e aporte financiero na e pamfleta. Tur miembro di e Plataforma di Salud, pa e parti di e contenido di e pamfleta. Ta hopi importante pa tur hende traha hunto pa bin cu informacion. Informacion ta e base pa deal cu e malesa di diabetes, pa por control’e y hasta preveni diabetes. E pamfleta riba su mes no ta bay haci nada, sin esfuerso di Praktijkondersteuners (POH), dokternan di cas. Nan ta bay traha cun’e y hunto cu Fundacion Diabetes cu lo bay promove e informacion di e foyetonan riba nan pagina di Facebook, Aruba Diabetes. Ta bay traha cu e doelgroep, cu no ta bay haya via television of corant, pero via Social Media, pa por informa comunidad riba diabetes.
Van der Kamp a agrega cu tin un cifra di hendenan cu ta haya tratamento. Esey ta un tiki mas cu 8 mil. Pero e proyeccion di e hendenan cu tin diabetes, pero no ta haya tratamento pasobra nan no sa cu nan ta diabetico of por ta no kier sa, ta hopi mas halto. E proyeccionnan di World Diabetes Organisation, ta te 12 pa 13 mil hende na Aruba cu por tin diabetes. Preocupante ta cu e edad ta bira mas abao. Hendenan mas hoben ta haya diabetes tipo 2, cual ta un malesa di hende bieu. Pero e estilo di bida, hendenan mas hoben ta haya e malesa cronico aki, esta diabetes tipo 2, cual ta hopi preocupante y ta algo cu por wordo preveni door di un otro estilo di bida. Esey ta cuminsa cu informacion, segun Joost van der Kamp