Jomark Flanegin y Kelvin Silvania tabata solido riba monticulo pa Royal Power derota Macuarima Indians den dos partido

Campeonato HEINEKEN fast pitch di Aruba Softball Bond a continua dialuna ultimo riba veld di Flatstone. E fuerte ekipo di Royal Power a enfrenta e ekipo di Sta Cruz Macuarima Indians kendenan ta luchando pa puesto number cuater pa drenta playoff. Den e prome wega e hoben Jomark Flanegin a tuma encargo di monticulo contra Benjamin Geerman di Macuarima. Ambos a mantene e wega 0-0 den e prome tres entradanan lansando un no hit no run ten a e momentonan ey. Royal Power desde cuater inning a cuminsa hunga e wega rapido esta e wega di toke y a logra kibra e cuadra di Macuarima y a cuminsa anota careda. Jomark Flanegin aportando na su propio causa ta conecta un cuadrangular leu den deep left pafo di cura. Royal Power finalmente ta seya e victoria di e prome partido. Royal Power 6 careda, 8 hit, 1 eror. Macuarima Indians 0 careda, 1 hit, 1 eror. miho bateadonan pa Royal Power a resulta Aldrick “Charro” Loopstok 1-1, Jomark Flanegin di 3-2. Pa Macuarima Indians Richard Simon ta conecta e unico hit y ta bay di 1-1. Den e di dos wega di anochi Royal Power ta inicia cu un otro pitcher den desaroyo Kelvin Silvania mientras Macuarima ta inicia cu nan trabucu di cura Lucio Geerman. Royal Power den e di dos wega tab aha brabo riba e indjannan di Macuarima y ta cuminsa anota careda desde e prome entrada. Lucio Geerman purbando na preta brasa pero no por a logra domina e bateria fuerte di Royal Power. Jomark Flanegin den di dos entrada ta conecta Lucio Geerman un cuadrangular bastante leu den centerright pafo di cura y asina riba mesun anochi a logra conecta tanto “omo y sobrino” dos cuadrangular. Royal Power 13 careda, 15 hit, 2 eror. Macuarima Indians 3 careda, 5 hit, 2 eror. E hoben Kelvin Silvania un pitcher lefthander den desaroyo por a mira atras riba un actuacion sublime cu hopi control y un tremendo cambio saliendo relativamente facil di su inningnan poniendo asina e victoria riba su nomber. Lucio Geerman kende ta wordo releva pa Benjamin Geerman ta bay cas cu e derota. miho bateadornan pa Royal Power ta Jomark Flanegin 4-3, Kelvin Silvania, Edward Cannister, Gregory Krosendijk y Franco Wouters tur a bay di 3-2. Edward “Gordo” Cannister tambe a conecta un cuadrangular. Aldrick “Charro” Loopstok a bay di 1-1. Pa Macuarima a destaca na plato Leander Angela 2-2 y Joshue Leanez di 3-2. Campeonato ta continua diahuebs awor na Flatstone unda Pizza Hut lo enfrenta Macuarima mientras mesun dia na Kudawecha Royal Power lo bataya contra Spuiters MIPA. Diabierna lo tin dos wega di playoff na Kudawecha. Softball fast pitch den pleno desaroyo.

Comments

comments