Internacional: Presidente di Merca, Joe Biden ta bisa cu e prome minister di Israel mester cambia su gobierno di frente duro y cu e sosten n’e campaña militar di e pais ta disminuyendo memey di bombardeo fuerte riba Gaza. Den un discurso dilanti e democratanan na Washington, Biden a bisa cu e prome minister Benjamin Netanyahu tin cu tuma un “decision duro.”
“Esaki ta e gobierno mas conservador di e historia di Israel,” Biden a bisa, añadiendo cu e gobierno Israeli “no kier un solucion di dos estado.” Biden a bisa cu Israel ta cuminsando na perde sosten rond mundo y a afirma cu Netanyahu “tin cu fortalece y cambia” e gobierno Israeli pa haya un solucion a largo plaso n’e conflicto Palestino-Israeli.
E declaracionnan aki tabata algun di esunnan mas sincero cu Biden a haci pa loke ta su opinion riba e actual conflicto. Mayoria di e biahanan e tabata na banda di Netanyahu den publico, a pesar di e creciente criticanan di e campaña Israeli. Sinembargo, mientras cu e cantidad di civil morto na Gaza ta aumenta, a bin ta habri un gap entre Merca y Israel.
Durante yamada di telefon, Biden a anima Netanyahu pa haci mas pa evita victima civil, pero e alto funcionarionan di e administracion a bisa cu ta existi un “gap” entre e intencionnan di Israel y e realidadnan riba e tereno.