Jocelyn Croes, actual consehero di Gabinete Mike Eman riba tereno di Relacionnan Internacional y Nacionnan Uni y ex Minister Plenipotenciario na Washington tambe tabata presente durante evento di lider di AVP Mike Eman diadomingo ultimo. Den un discurso cu el a tene dilanti un sala completamente yen, Croes a expresa e admiracion grandi cu e ta sinti pa e politico y gobernante Mike Eman, un persona cu el a siña conoce ora e tabata Minister Plenipotenciario di Aruba na Washington.
“Hopi ta lubida cu e Prome Minister no ta presidi solamente riba e Gabinete y ta Minister di Asuntonan General, pero tambe tin un rol activo den ramo internacional,” Jocelyne Croes a splica. El a topa e mandatario pa prome biaha na 2009 na Washington. E reunion aki tabata programa pa dura mei ora. Pero pa su sorpresa e combersacion a bay asina bon, cu e encuentro a dura 3 ora. Durante e reunion ey “tabata obvio cu Mike tin un vision hopi fuerte di unda e kier hiba Aruba. Ainda mas, pa logra e vision aki pa Aruba, e no por haci’e den isolacion, principalmente den e mundo di awendia unda cu nos tur tin lasonan cu tur paisnan rond mundo, unda tecnologia y desaroyo hopi lihe ta hunga un rol grandi. Como pais chikito bo no por opera bo so. Mike a bin ta compronde esaki y mi a mira esey den e prome reunion cu mi tabatin cune.”
Aruba tin un nomber fuerte internacionalmente, un pais chikito pero cu nomber super grandi. E nomber fuerte aki no solamente tin di haber cu e producto turistico, pero pa logra esaki el a tuma hopi esfuerso y curashi di hopi Arubiano pa decadanan largo. Un di e puntonan cardinal den e vision di Mike Eman ta pa trece un diversificacion di e economia di Aruba, y pa haci esey mester haci Aruba conoci como un pais cu ta mas cu solamente solo y lama. Pa logra un vision y logra cu Aruba ta wordo mira como un “Green gateway”, un luga cu ta sano pa inverti, un luga cu bo kier como partner internacional, bo mester traha hopi duro pa logra un otro reputacion di un otro vision. “Bo mester traha duro. Mike a haya basta critica pasobra e ta biaha internacionalmente, pero pami esey e mester a haci pa logra hiba nomber di Aruba rond mundo. Ora cu Mike yega Merca, waw, e ta habri asina hopi porta cu ta mustra increibel. Mi ta bisa esey cu hopi conviccion.”
E ta corda ainda e prome bishita di Mike na Embahada Hulandes Washington, unda tabata presente un hefe di Departamento Economico Hulandes, kende a bisa “waw deze man heeft visie. Ik wilde dat wij zo’n leider hadden in Nederland waar wij trots op konden zijn”. Tambe el a bisa cu Mike tin un habilidad di tene un discurso increibel y a wordo reconoci internacionalmente pesey. El a duna ehempel con Vice Presidente Biden y Secretario di Estado Kerry ta elogia e mandatario Arubiano y ta invit’e na reunionnan internacional. Esaki mientras cu e ta lider di un pais chikito. ‘Pa Mike logra algo asina, ta increibel. Tin hopi invitacion cu e mester a rechasa pasobra e tin hopi trabou. Ta asina bunita cu Nacionnn Uni a reconoce su habilidad. P’ami ta hopi bunita ora cu bo tin un sub secretario di UN ta bisa cu ta masha poco comun pa topa un lider cu un vision cla y progresivo pa su pais. Boso no ta realisa con unico esaki ta. Nos ta sinti nos comprometi pa traha cu Aruba; su liderazgo ta inspira nos y loke nos kier pa comparti e trabou cu Aruba a haci cu resto di mundo. Door di biaha internacionalmente, papia den exterior, reuni cu Banco Mundial , cu Rocky Mountain Institute, cu Carbon War Room, Harvard University, y Union Europeo na nivel di un lider mundial, Mike ta logra esaki. Door di bay afo, Aruba y Mike ta wordo reconoci door di Hulanda, y Nacionnan Uni ta pidi Mike pa hiba palabra den nomber di Reino. E ta wordo reconoci pa su vision y convinccion.Pesey awe tin TNO na Aruba, colaboracion cu Richard Branson y MOU cu diferente instancianan internacional, acuerdo cu FIU, tin un Centro of Excellence di SIDS di Nacionnan Uni na Aruba. No ta sin mas ta logra e cosnan aki. Mi ta spera cu boso tur ta orguyoso mescos cu ami ta orguyoso di e rol cu Minister Presidente a bin ta haci na nivel internacional y crea un nomber y oportunidadnan unico pa Aruba.”