Joanne Arends, kende ta e Airservice Development Manager, ta splica cu un desaroyo asina positivo, sigur ta alinea cu e strategia di sigui diversidad den puntonan di conexion den e Mercado Mericano.
Arends a bay riba Jet Blue, cu ta un partner importante y valioso, no solamente pa aeropuerto, pero tambe pa e destinacion cu ta aporta na 21 vuelo pa siman, 9 di nan por conta cu ta bin for di Boston. 12 vuelo for di New York y awor aki 7 vuelo director for di Fort Lauderdale. Ademas di esaki, no solamente a wak expansion riba vuelonan, pero tambe den e servicio cu Jet Blue ta duna na e pasaheronan. Nan lo tin dos extra vuelo riba diasabra, cu a wordo yama e Mint Service, cu ta un producto y concepto nobo cu Jetblue a introduci aña pasa y Aruba lo conoce dos di nan riba diasabra. Loke ta haci’e un concepto nobo, ta cu nan ta ofrece un business class riba e Airbus 320.
Jetblue lo ta bulando 7 biaha pa siman, dus tur dia lo bay tin un vuelo directo di Fort Lauderdale pa Aruba. Ekipo cu lo wordo uza pa opera e ruta aki, lo ta e Airbus 320, cu tin un capacidad di 150 stoel. No solamente e lo crea un fluho mas for di e Fort Lauderdale cu ta conecta pa Aruba, pero ta crea un conexion pa diferente destinacion popular den e parti west cu por wak cu ta Las Vegas, San Francisco, San Diego, etc.
E vuelo aki ta programa pa sali 4’or y 20 for di Aruba y lo tin un duracion di mas of menos 2 ora pa yega Fort Lauderdale. Loke ta encera e temporada di winter, cu ta cuminsa na November 1, te cu Maart 31, ta premira un crecemento di 7%, cual sigur ta un record den e ultimo cinco añanan aki, cual lo agrega 25500 stoel adicional di e mercado Mericano pa Aruba. For di e hubnan principal, no solamente JetBlue, tin diferente desaroyo di parti di Delta. A wak un crecemento di mas of menos 24% for di e punto di Atlanta pa Aruba, unda cu nan a scoge pa crea door di e demanda asina halto, pa añadi un ekipo mas grandi cu ta e Boeing 767-400, cu tin un total di 246 stoel pa cada ruta.
United tambe na su luga a haci diferente cambio den nan strategia di nan network, unda cu nan a añadi mas capacidad for di Newark. American Airlines tambe a wak cu desde dia 15 di December lo cuminsa di tercer vuelo diario cu ta un total cu ta conta di casi 21 vuelo for di Miami pa Aruba, den e periodo di winter.