Numbernan pa aña 2017 pa hotelnan ta positivo, pero esey tabata pasobra Januari 2016 tabata hopi abao, compara cu 2015 y 2016. A bay bek y check y a ripara cu Aruba su turismo a conoce un aumento chikito di 2%.
AHATA ta contento di a recupera di 2016, pero tambe nan ta na altura cu tin mas trabao pa haci, y nan ta wardando e lunanan di Februari y Maart 2017. Hotelnan ta indica cu cos ta bayendo bon, pero mester ta realistico cu ta solamente un ocupacion di 2 of 3 %. Pa motibo di hopi competencia eyfo, hotelnan no lo conoce un aumento den e prijs di cambernan, kisas di 2%.
Cu tin crecemento turistico, ta algo sumamente positivo, pero e no ta algo cu por gaba masha di dje. Y esey probablemente lo sigui pa loke ta resta di 2017. Pa e hotelnan, e cifranan ta mustra positivo, pero esey ta pasobra cu a compara e cifranan di e aña aki cu esunnan di Januari 2016.
Na Januari, a wak e vuelonan diario for di Fort Lauderdale, cu Jetblue y tambe avionnan mas grandi bulando for di Atlanta, cu Delta. Y tambe Charlotte, di cual American Airlines ta uzando avionnan mas grandi. Dus, esey ta algo positivo y AHATA ta spera cu esaki por sigui durante 2017. Pero e situacion na Venezuela ta sigui ta un preocupacion, e tin su impacto hopi grandi riba e hotelnan, pa motibo cu Venezolanonan tabata keda den casnan priva, condominio of apartamentonan.
Aruba Airport Authority a haya nan mes ta ahusta nan budget, pa motibo di e caida di turistanan Venezolano. Pa esaki, awor ta fiha bista ariba e mercado Mericano,pa balansa e perdida di e mercado Venezolano, sperando cu esey lo por yena e bashi cu e mercado Venezolano ta laga atras.
Durante un reunion teni nan Bahamas, den e Caribbean Hotel Association Market Place, caminda cu nan a hiba combersacionnan cu algun cu tour operatornan. Tabata tin algun problema cu a bin dilanti y un di nan tabata cu Mexico ta ofreciendo asientonan, cual a resulta den biahenan pa Mexico pa un prijs sumamente abao. Un otro punto di preocupacion ta tambe ta Republica Dominicano a habri 5 mil camber nobo, di cual mayoria ta all inclusive. Esey ta haci e competencia hopi mas grandi. Pero e preocupacion mas grandi cu un gran parti di e tour operatornan ta ricibi yamadanan di posibel clientenan cu ta dispone di greencard, cu ta hopi preocupa cu si nan lo tin problema pa drenta Merca, cu nan greencard. Esaki ta pa motibo di e polisa di Presidente Trump, relaciona cu greencard y visanan, basicamente haciendo e mas streng di ken y ken no por drenta Merca.