LOS ANGELES, California – E conocido actor Mericano, Jim Carrey a wordo demanda dialuna pa a suministra presuntamente, cu un nomber falso, droga na su amiga, kende a muri di un sobredosis aña pasa y pa purba di sconde despues su implicacion.
Di acuerdo cu e demanda, presenta na e Corte Superior di Los Angeles, pa Mark Burton, casa separa di e ex amiga di Carrey, Cathriona White, e actor a “uza su inmenso rikesa y posecion di fama” pa obtene droga pa White.
Burton ta sigura cu e actor tabata cumpra droga cu e nomber di “Arthur King” y despues “a tuma pasonan pa oculta y confundi su implicacion y culpabilidad” despues di e morto di White.
No tabata posibel contacta e representante di Carrey pa duna comentario al respecto.
Den e demanda ta bisa cu Carrey tabata obsesiona cu controla y manipula e muhe di 30 aña, cu kende e tabata tin un relacion intermitente desde 2012 y cu e por a controla camaranan di videovigilancia den un cas di Los Angeles, caminda cu White tabata keda den algun ocasion.
E actor y su asistente tabata presuntamente al tanto cu White no a sali di e cas den mas di un dia na September, ora cu el a muri, pero no a actua.
E informacionnan di prensa na momento di morto di White, ta bisa cu Carrey y e a kibra algun dia prome.
E dia ey, White a manda un criptico mensahe riba su cuenta di Twitter cu a bisa: “Mi ta desactivando mi Twitter, mi ta spera di tabata un luz pa mi personanan di mas cerca y stima.”
Segun e husgado di instruccion, White a kita su bida cu un sobredosis di un cantidad letal di medicamentonan receta.
E demanda ta afirma cu e tres boternan di pildo cu a haya hunto cu e curpa tabata na nomber di “Arthur King.”
Fuente: NTN24