Jetblue ta introduci buelo for di Fort Lauderdale pa Aruba

Ayera mainta den presencia di Ministro di Turismo Otmar Oduber, CEO di Aruba Tourism Authority Ronella Tjin Asjoe-Croes y Gerente di Mercadeo di Aruba Airport Authority Joanne Arends, a anuncia cu JetBlue a lansa servicio entre Fort Lauderdale-Hollywood International Airport y Aruba su Aeropuerto Internacional Reina Beatrix. Cu buelonan diario entre sur di Florida y Aruba, buelonan lo cuminsa lanta entrante dia 4 di Januari, 2017. Bentanan a inicia dialuna 29 di Augustus 2016.
Mientras cu e mercado di Merca a crece cu 8% aña pasa pa cu pasaheronan ‘stay-over’ pa nos isla, e aña aki A.T.A. a bin ta pone mas enfasis riba e mercado Mericano debi cu turismo for di Merca pa e region Caribense a bin ta confronta diferente retonan y ta simplemente rekeri empuhe adicional. Un winter suave na Merca durante e prome lunanan di e aña aki na e parti Noreste di Merca -e mercado principal pa Caribe y Aruba- a afecta e comportacion di e turista Mericano. Tambe e impacto di ZIKA, competencia di ‘acomodacionnan alternativo’ pa hotel y economianan bou presion den mercadonan manera Brasil y Canada, ta pone cu A.T.A. ta dirigi enfoke adicional na captura mas bishitante di Merca.

UN TURISMO STABIL DANKI NA PARTNERNAN AEREO MANERA JETBLUE
Otro motibo principal pa pone mas enfoke riba Merca ta pa sigura cu Aruba su turismo ta keda mas stabil cu ta posibel no obstante caida di e mercado di Venezuela. Esaki ta rekeri atencion adicional riba Merca cu por brinda Aruba volumen di bishitante pa asina compensa volumen di e grupo di Venezolano cu no ta biaha mas. Esaki mas tanto cu ta posibel. “Di Aruba su 1.22 miyon di bishitantenan na 2015, un 7.7% cu a wordo duna bonbini tabata bishitantenan di Merca. Mientras cu anualmente Aruba ta sigui crece den turismo ‘stay-over’, JetBlue ta permanece un partner importante y strategico pa crecemento di Aruba su turismo”, Minister Otmar Oduber ta comparti durante e rueda di prensa.
“Aruba su partnership cu JetBlue lo continua na eleva nos turismo na nivelnan nobo. E aerolinea aki su servicio diario di Fort Lauderdale, lo sirbi como hub importante pa ricibi mas bishitante for di entre otro e region Oeste di Merca pero tambe di e parti Sur di Florida cu ta un area unda A.T.A. ta activando mas”, segun Sra. Ronella Tjin Asjoe-Croes, CEO di Aruba Tourism Authority. El a sigui elabora y a agrega cu tin como meta pa logra un crecemento di 5%

for di e mercado di Merca otro aña. E adicion di hub di JetBlue aki ta cardinal pa por logra e crecemento aki. JetBlue a trece entre 20% pa 25% di bishitantenan for di Merca pa Aruba durante e ultimo 5 añanan.
Mester corda cu na 2014, e di un miyon bishitante ‘stay-over’ cu a yega Aruba, a yega cu JetBlue. Pa loke ta e region Oeste, esaki a bin ta mira un crecemento ultimo añanan; na 2010, 38 mil bishitante di Merca a bin di e region Oeste. Na 2015 esaki a crece y yega na 59 mil bishitante. Otro beneficio cu e puerto nobo di Fort Lauderdale ta trece cu n’e ta cu e lo sirbi un otro meta cual ta atrae mas bishitante di e parti Sur di Merca, aki mester pensa riba e strategia pa atrae e mercado Hispano Mericano, cu ta un mercado cu A.T.A. a inclui recientemente, enfocando specialmente riba e Venezolano emigra cu historicamente semper a bishita Aruba pa vacacion y cu tin afinidad cu Aruba y un patronchi di gasto atractivo.

DEDICACION CONTINUO
A.T.A. ta invertiendo 4 miyon adicional den Merca e aña aki, pa asina carga e empuhe mas fuerte cu ta necesario. Ademas, A.T.A. conhuntamente cu JetBlue lo lansa campaña promocional pa asina promove e ruta nobo aki, cual JetBlue tin como meta pa conberti den un di nan hubnan fuerte, fuera di Boston. Hecho ta cu JetBlue ya caba ta e aerolinea cu mas servicio for di Fort Lauderdale Hollywood International Airport y tin e intencion di crece te cu 140 buelo diario for di e hub aki den e proximo añanan.
Aruba Tourism Authority ta para pa un turismo den balanse y diversifica na un relacionnan solido ta wordo cuida y desaroya cu partner turistico. P’esey ta gradici partner strategico JetBlue, kende ta referi na e partnership cu Aruba como uno di ‘gold standard’.
“Esaki ta un logro importante danki na e ekipo di A.T.A., AAA, y Ministerio di Turismo kende a traha duro pa por anuncia e logro grandi aki pa Aruba y su Turismo. Danki y pabien!”, señora Ronella Tjin Asjoe-Croes, CEO di Aruba Tourism Authority a indica na clausura di e rueda di prensa.

Comments

comments