E meta di e gas lo ta uno pa hopi mas cos si mira cuanto gas Venezuela tin y kico por spera pa Aruba, segun Jesus Luongo di PDVSA, na ocasion di e reapertura di e refineria cu awor a bira Citgo Aruba Refinery.
PDVSA ta un compania di estado y nan tin un concepto diferente pa haci negoshi y tin cu busca e rendabilidad. Tin cu traha na e refineria pa hacie rendabel. E rendabilidad economico ta importante, segun Luongo. Aki tin un oportunidad di establece y profundisa e lasonan cu lo ta excelente. Luongo ta bisa cu Aruba y Venezuela ta bisiña, pero nan ta iremediablemente y por bien destina pa ta hunto, pa comparti hunto pasobra nan ta dilanti.
Venezuela tin e octavo reserva di gas na mundo. Nan ta bay pon den produccion un campo di gas aña pasa, pa mas of menos 50 kilometer dilanti e peninsula di Paraguana dilanti costanan di Aruba, mas den zona di e Golfo. A cuminsa cu e produccion na Juni, aña pasa y awor ta produciendo 510 miyon cubico pa dia y den tres aña lo bay ta riba 1300 miyon cubico pa dia. Lo bay tin gas no solamente pa Venezuela, sino lo bay tin gas pa Aruba y esey lo bay potencia. Naturalmente algo cu ta importante pa Aruba. Gobierno y pueblo di Aruba ta doño di Aruba. PDVSA tin solamente tin un contracto di operacion y mantencion mas nobo. Desde 1985 nan ta na Corsou, cu e refineria di Corsou, esta Isla, bao di un sistema similar y e refineria aki ta di e Gobierno y pueblo di Corsou y ta huur’e, cual PDVSA ta oper’e y ta mantene. Ta bay cumpli 31 aña cu nan ta na e refineria. Nan no a bin pa haci negoshi manera cu cualkier compania a bin ta haci. Nan tin un conciencia diferente pasobra nan ta balora e principio di construi un pais cada dia miho, construi un socialismo, construi e maximo felicidad pa e pueblo, Luongo a expresa.