Tawata 35 aña pasa cu Jessica Lacle a caba scol y mesora a cuminsa labora den e industria di Hospitalidad.
Cu apenas 20 aña, Jessica a inicia su carera den e departamento di contabilidad di e proyecto di Timesharing Playa Linda Beach Resort, caminda despues di solamente 16 luna el a obtene e posicion di assistant comptroller.
Na aña 1999, Jessica a cambia di proyecto, y hunto cu e Gerente General di e hotel e tempo ey, a sigui den e industria, e biaha aki como internal auditor di Faro Blanco Restaurant.
Semper dispuesto pa siña y habri pa cambio, Jessica a pasa den diferente retonan y sistemanan nobo di administracion cu un mente positivo. Jessica semper a domina su trabou y a crea tempo pa yuda tambe den e parti operacional na Faro Blanco Restaurant, caminda sin duda e ta hopi stima pa henter e equipo.
Den un ambiente hopi ameno, Jessica, den compania di tur colega y su famia, a celebra su 35 aña di servicio y gran contribucion na Turismo di Aruba. Jessica a ricibi un reconocimento special pa su trabou incansabel for di man di Minister di Turismo y Salud Publico sr. Dangui Oduber como tambe di Directora di Faro Blanco Restaurant, Sra. Betty Werleman.
