Jennifer Jacobs: APFA lo tin un reunion importante dia 31 Augustus

Tur aña APFA tin cu duna cuenta pa loke ta nan relato financiero. Akinan, Jennifer Jacobs ta splica mas di e presentacion cu lo tuma luga diaranson, di 31 di Augustus.
Manera ta custumber, anualmente APFA ta tene un reunion general pa su participantenan. Esaki ta tanto pa esnan cu ta activo, como e pensionadonan. Esaki lo tuma luga diaranson awo, manera ya menciona, for di 7’or pa 8’or y mey den Cas di Cultura. Esnan cu tin idea pa asisti, pa bin cu un ID valido. Ta bay cuminsa cu registracion tempran y pa esaki ta pidi pa e hendenan yega pa 6’or y mey di atardi.
APFA tin cu presenta su relato financiero anual y ta bay haci esaki riba e anochi ai. Fuera di esaki ta bay duna informacion riba e desaroyonan cu APFA a haya den 2015 y tambe ta bay tin un orador invita cu ta bay ta sr. Arien van der Grient, cu ta un specialista riba tereno di pensionfund governance. E tema ta importante mirando cu den e acuerdo bilateral cu Gobierno, minister di finansas a institui un comision, cu a bay evalua e structura di governance di APFA. Den cuadro di e tema aki, APFA kier duna mas informacion riba con APFA ta hinca den otro y con un fondo di pensioen, mester tin e tema di governance tambe na ordo.
Ta asina cu tur participante di APFA ta invita pa asisti na e reunion aki. E ta hopi importante y di parti di APFA kier haci un yamada special pa e participantenan hoben activo, ya cu como experiencia, cu segun cu ta yegando edad pa bay baha cu pensioen, e ora ta busca informacion. Kier stimula e hobennan, pa busca informacion tempran, ya cu tin circunstancianan personal ta haci cu por tin un influencia riba e pensioen cu ta bay ricibi despues cu baha. Di parti di APFA, pensionadonan ta mas cu bon bini. Tur participante obviamente, pero un yamada special ta bin di APFA pa e hobennan activo, pa tambe tene nan mes na altura di e desaroyonan di e fondo, Jacobs a splica.

Comments

comments