Sra. Arends-Reyes tawata t’ey recientemente na e première di e peliculanan cortico cu diferente scolnan basico a cualifica cun’e. Mester bisa cu e peliculanan cu a ser presenta tur tawata tin un bunita mensahe pa e publico. Diferente scolnan basico a wordo acerca dor di un cooperacion di Telefon pa Hubentud, CEDE Aruba y Unicef Hulanda pa un campaña di conscientisacion tocante derechonan di mucha. E alumnonan a traha di cerca cu e material y na final mester a scoge un derecho y traha un pintura di dj’e. Nan a siña masha hopi di e derechonan y a traha un pelicula cortico tocante un derecho. Tawatin temanan manera voz di mucha ta conta, union familiar, tur mucha tin derecho riba un famia y muchanan tin derecho riba privacidad. Durante e mainta tur fraccion den Parlamento tawatin representacion, sea ta di nan lider di fraccion of nan suplente na e evento di Unicef aki. Durante e mainta a saca e scol ganado di e pelicula cortico cu lo bai representa Aruba na Curaçao proximamente den e Unicef Child Rights Caribbean Film Festival. Un palabra di pabien na tur scol cu a participa y tambe na Santa Filomena cu a gana e honor di representa Aruba den e final na Curaçao. Tambe un palabra di elogio na Telefon pa Hubentud y CEDE Aruba cu a carga e proyecto aki pa Aruba. Proyectonan asina ta keda sumamente importante pa nos muchanan y hobennan pa sigui conscientisa y educa nos muchanan, hobennan, mayornan y scolnan. E tema di derechonan di mucha mester keda bibo den nos comunidad y proyectonan creativo asina ta di aplaudi, Sra. Arends-Reyes ta termina bisando.