Diadomingo marduga central di polis ta haya un yamada for di un dama cu tabata grita pidiendo ayudo banda di Arashi y ta cera e telefon. Central di polis ta mobilisa e patruya nan di Noord mesora pa e sitio. Na caminda otro informacion ta drenta cu lo ta trata di un jeep geel cu 4 hende homber aden cu lo mester a horta un cel di e dama na Arashi.
E reportero di 24ora tawata den cercania y a topa cu jeep riba e caminda di L.G. Smith den cercania di Marriott. E reportero a cuminsa persigui e auto y meld na central unda e auto ta bai y Pero e chauffeur di e jeep lo a ripara y a baha caminda pa laga e reportero pase. Jegando e lusnan di trafico bandi Mcdonald’s na Noord e reportero ta wak un patruya y ta bay duna e patruya un señal cu esei ta e jeep pero e jeep ta bin cu un velocidad hopi halto y ta dal duro tras di e auto di 24ora.
Despues di e impacto e auto kier a core bay pero polis cu a wak tur cos a yega dibiaha y e reportero tambe a bira su auto pa stroba e jeep bandona e sitio. E pasahero den e jeep a dal su cabes basta duro den e windshield di e jeep. Pero door cu e tawata asina hopi burachi e no tawata kier asistencia medico. Polis a detene tur cuater persona pa mas investigacion. Den e auto polis a haya un celular benta. E dama a presenta na warda di Shaba pa entrega keho. Daño material tabata hopi y hasta e camara di e reporte a kibra den su auto debi na e impacto.