Un bes mas JCI Aruba lo tene su actividad pa tur esnan cu kier siña algo tocante finansas. Pa esaki sra. Roslyn Croes, presidente actual di JCI Aruba, ta splica riba e Personal Financial Management cu lo bay tuma luga den luna dia 3 di Juni, den MFA na Noord.
E training aki lo wordo duna door di Dave Martinus, kende lo comparti cu esnan presente, con pa maneha nan parti financiero. Tambe e participantenan lo haya tips ora di compras, nan por spaar nan cen. Den e training aki tambe lo toca e tema di con ta interactivo cu otro. E training aki lo ta na balor di 75 florin pa persona y lo ta for di 10’or di mainta pa 2’or di merdia, cu un light lunch. Dress code ta business casual. Por haya carchi via nan website www.jci.cc-Aruba.com of via nan email cual ta [email protected].
Por yama tambe na e numbernan 5943331 – 7324240 y 7441444. JCI tambe ta riba Facebook riba JCI Aruba.
E training aki ta enfoca riba tur persona cu tin un salario y cu kier siña maneha nan parti financiero mas miho.
Doñonan di negoshi tambe por participa. Tambe ta un parti di e training. Si nan kier siña maneha nan parti financiero, tambe ta bon bini. E por ta negoshinan chikito of grandi, individualnan cu kier siña un tiki mas.
A puntra Croes dicon JCI a dicidi di bin cu e tema di Personal Financial Management, tin un demanda pa loke ta falta di conocimento con pa maneha nan placa. Croes a splica cu e entrenamento aki ta algo cu sa bin dilanti hopi cu hendenan ta bisa cu nan no sa unda e placa ta bay. Esey ta e prome cos cu nan ta bisa.
Pero cu esaki lo nan por siña di sa unda e placa ta bay y unda e no mester bay. E ta yuda nan tambe den e parti di spaar y ta conciente den loke nan tin.
Roslyn Croes a comenta cu Dave Martinus ta un JCI trainer. E ta capacita pa duna e training aki.
Indira Abath, miembro di JCI ta splica unda por haya carchi y ken por wordo yama pa haya chens pa participa den e evento aki, cual sigur ta importante.
Esaki ta un seminario hopi interesante y interactivo. Den pasado el a wordo haci y e hendenan a gusta. P’esey a dicidi di bin cun’e un biaha mas. Si bo ta un persona cu ta bisa “mi no por yega financieramente fin di luna, mi no sa con pa haci cu mi placa, mi ta den rood, mi kier haci algo leuk, mi no por”, esaki ta e oportunidad. Dia 3 di Juni, JCI ta wardabo. Carchinan ta obtenibel cerca tur miembro di JCI Aruba of na e numbernan ya menciona, cu por wordo yama libremente pa por acerca JCI Aruba pa haya e ticket pa bin e seminario aki. JCI Aruba ta wardabo. E oportunidad tey y esaki ta un training caminda cu hobennan por siña maneha nan placa, con pa spaar y na final, nan ta saca fruto di dje.
E training aki ta hopi esencial pa nos hobennan, pa tur hende cu ta traha, tur hende cu kier tin negoshi, tur hende eigenlijk ta bon bini na e training aki. No tin limitacion di genero, di edad, nada. Tur hende cu ta traha of un compania kier pa nan departamentonan di finansas por traha un tiki mas y miho. Kisas por bin cu e tipsnan mas miho, tur hende aki ta welcome na e seminario, Abath a termina.