Jarissa Dubero: Aruba merece miho enseñansa

“Ami ta un mama. Ami ta un maestro y ami tin hopi ex-studiante cu mester a lucha hopi duru mes pa caba scol y mucho hopi cu apesar di nan lucha, no a logra caba scol. E situcion den enseñansa aworaki ta mas preocupante cu nunca antes. Nos no por laga e situacion sigui bay fo’i man. Nos tin cu cambia e situacion den enseñansa awor, prome cu ta laat!” Cu e palabranan aki señora Jarissa Dubero, juffrouw Ja, a introduci su mes ayera nochi den Cas di Partido, como candidato pa eleccion di 25 di juni awor, riba lista di partido AVP.

‘Juffrouw Ja’ no a sconde e frustracion cu e ta comparti cu su coleganan maestro den enseñansa, pa motibo di e maneho di e minister actual. El a menciona cu e ambiente di trabou a bira asina malo den e ultimo añanan, cu tin maestronan hoben cu ta puntra pakico nan a bira maestro di scol, si nan no ta haya sosten y oido di e minister di enseñansa y e gobierno di Aruba pa educa nos muchanan. E tabata un testimonio cu a gara atencion di tur hende y cu sigur lo haya continuacion durante y despues di e campaña pa eleccion.
Ken ta Jarissa Dubero?
Jarissa Dubero ta un juffrouw di scol secundario, kende tin 16 aña ta eherce e trabou di maestro na diferente scol secundario. El a caba su Bachelor den e materia di ‘BeeldVorm & Kunst’ na Hulanda. E ta un materia nobo cu ta encera practica di diferente forma di arte. E forma cu juffrouw Jarissa ta duna su lesnan y su relacion cu su studiantenan a haci’e un maestro hopi stima y respeta.

Su mision ta pa trece e confiansa perdi bek entre minister, sindicato, fundacion-, departamentonan- y maestronan. E forma cu e kier logra esey ta door di stimula dialogo den tur sector y na tur nivel di enseñansa. Su vision ta di un Aruba cu enseñansa bon cordina for di peuter/creche te na HBO/educacion profesional y superior.
Campaña, website y competencia
Jarissa Dubero su manera di campaña pa e eleccion ta diferente. Jarissa ta sigui educa tur hende. Tambe den campaña. Ariba su website por sigui diferente workshopnan informativo manera splicacion di diferente topico di nos politica, con pa anda cu budget y mas. Riba e website tin un competencia hopi creativo pa Aruba unda bo por participa y gana premio super bon.

Comments

comments