Dia 16 di februari 2020, Japan Karate-Do Ryobu-Kai-Aruba, “dojo Konishi” a celebra nan di 15 aña di existencia. Dojo Konishi ta forma forma parti di Japan Karate-Do Ryobu-Kai (JKR) cual a wordo funda pa Sensei Yasuhiro Konishi, 10 Dan, y desayora pa su yiu homber, Yasuhiro (Takehiro) Konishi, 10 Dan. JKR tin diferente Dojo rond di mundo cual actualmente ta wordo lidera pa Kiyoshi Yamazaki, 9 Dan, kende alabes ta fungi como Presidente, Director International y Instructor.
Celebracion a tuma lugar diaranson, 19 di februari, conhuntamente cu sensei Felix Tromp y sensei Ligia Perregil, alumnonan, directiva y mayornan presente. Ta 15 aña pasa cu sensei Martin Materano (ex miembro di selección nacional di Venezuela entre 1982 y 1998 y Campeón Nacional den Kata desde 1986 hasta 1998), como invitado special, a inaugura e prome entrenamento oficial di Dojo Konishi. Dojo Konishi ta reflexiona ariba e 15 aña nan yena cu positivismo, alegría, perseverancia y reto nan. Dojo konishi su obhetivo ta entre otro, pa mantene e alumno central y ta pone atencion ariba e progreso mental y corporal como tambe ta aporta na engrandece confianza, diciplina, flexibilidad, forsa, balance y coordinación di e alumno.
Sensei Felix Tromp y Sensei Ligia Perregil ta desea di duna palabra di sincero gradicimento na un y tur cu a aporta y ta aportando na Dojo Konishi durante tur e aña nan aki. Sin boso aporte, nos no lo por a celebra 15 aña di existencia. Di curason, masha danki!
Alabes kier a informa tur esnan cu ta intresa pa practica e deporte di karate, por pasa bisita nos na Dojo Konishi, EPB-Hato Oranjestad, ariba dia nan dialuna, diarason y diaberna, entre 5:30-6:30.
- Latest
