E aña aki pa shete biaha, Fundacion Movimiento ta Bida ta organisa actividadnan di movecion pa nos 60+ plussers den e asina yama Jani Brokke Memorial, dedica na e legendario deportista Arubano, Jani Brokke awe den feliz memoria. Fundacion Movemiento ta Bida, un organisacion sin fin di lucro, ta traha duro pa conscientisa nos hendenan pa biba un bida unda e palabra movecion ta central, esaki specialmente bou di nos adulto y grandinan. E actividad di tur aña esta e Jani Brokke Memorial ta dedica na un persona cu a representa Aruba varios biaha den exterior como atleta den diferente deporte y te na un edad relativamente grandi ainda a sigui practica deporte entre otro, tennis.
E luna di September a bira e luna unda ta organisa e eventonan deportivo pa nos grandinan. Mester bisa cu e aña aki den varios ramo di deporte lo competi contra di otro esaki den un forma sano y ambiental. Lo por participa den ocho ramo di deporte manera softball, volleyball, atletismo, biyar, domino, bowling y tennis. Remarcabel ta cu nos comunidad den e di 60 aña y mas cada dia ta birando mas consciente cu pa biba un bida sano haci movecion modera cual ta e elementonan di mas importante, esaki ta yuda relaha e curpa den tur sentido di palabra.
Un danki sigur na Lotto, e Loteria di Aruba pa medio di Comision di Subsidio cu a contribui cu e actividad di Jani Brokke Memorial organisa pa Fundacion Movimiento ta Bida.
Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e comision di subsidio.