E conocido comediante/actor/presentador di Corsow, Sr. Jandino “Judeska” Asporaat a haci un bishita di cortesia cerca Minister Plenipotenciario, sr. Guillfred Besaril. Durante e bishita aki Sr. Asporaat kier a explora e oportunidadnan di colaboracion riba un proyecto cu e ta pensa di bin cune na Corsow. Esaki ta encera habri un hotel cu por sirbi como un scol di ofishi den e ramo hotelero. E instituto aki lo mester percura pa mas profesionalismo den e sector di turismo y hoteleria di Corsow. Na mes momento Sr. Asporaat kier brinda oportunidad na hobennan di Corsow cu por ehempel no a termina nan formacion secundario. Di e manera aki kier brinda nan un miho chens na drenta e mercado laboral y na bai dilanti den bida. Pa e scol aki por brinda bon educacion, lo mester busca profesionalnan for di e mundo di turismo pa duna les y ta net riba e punto aki Sr. Asporaat a acerca Minister Besaril pa sondea e oportunidad di aserca e profesionalnan na Aruba. Sr. Asporaat a remarca cu Aruba durante e ultimo decadanan a acumula experencia grandi den e ramo di turismo y hoteleria, por lo tanto Aruba ta dispone di hopi profesionalnan cu por duna e guia y preparacion necesario. Conhuntamente cu esnan na Corsow lo por crea un clima educacional cu ta mantene un caracter Caribense. Sr. Jandino ta mira esaki como e elemento principal di e proyecto cu e ta desea na stimula. Na final e personal di Arubahuis y ATA a haci uso di e oportunidad di e bishita di Jandino Asporaat pa saca un potret hunto cune. Sr. Asporaat ta hopi conoci y famoso na Hulanda pa su “De Dino Show” na television Hulandes. Tambe Sr. Asporaat ta e actor principal di e dos peliculanan “Bon Bini Holland” y “Bon Bini Holland 2”. Ambos pelicula tabata un hit grandi den cinemanan di Hulanda, Aruba y Corsow. Nota di redacion: E potretnan ta cortesia di Cas di Aruba.