James Finnes, presidente di e Funfacion Nos Kier Boneiru Bek, den un carta ta yama atencion ariba un desaroyo anti democratico emergente den sur di Caribe. E carta ta bisa asina ‘ki: “Dia 20 di november 20`8, e gobierno ilegalmente destitui di St. Eustatius tabata den corte den un caso contra gobierno Hulandes, pa defende y lucha pa su derecho democratico y fundamentalmente irenunciabel na un medida completo di auto gobierno segun e Tratado di Nacionnan Uni.
Na comienso di aña, na februari, gobierno Hulandes, encabesa pa Secretario di Estado di Hulanda pa Relacionnan di Reino, Sr. Knops, un teniente coronel militar experiencia, cu a participa activamente den e guerra di Irak, a trabes di un decision y accion anti-democratico di parlamento Hulandes a desembarca cu 40 polis y un barco di marina Hulandes den waf di St. Eustatius. Abusando di su poder, nan a baha e gobierno local legitimo y democraticamente eligi y nan a designa un gobernante no democratico y un gobernador pa goberna e isla di St. Eustatius.
Mas aleu, siman pasa, gobierno Hulandes, bou di menasa y intimidacion di tuma otro medidanan, dentro di un plazo di 24 ora, a obliga gobierno di Bonaire di entrega su podernan limita cu e tin, na gobierno Hulandes y awo mescos cu St. Eustatius ta bay bek completamente bou di dominion Hulandes. Ta designa un administrador no eligi democraticamente, pa goberna e isla di Bonaire. E gobernante colonial, mescos cu St. Eustatius, ta responabel y ta informa solamente na gobienro Hulandes na Den Haag.
Por lo tanto, e gobierno local eligi di Bonaire a wordo degrada na un espectador pasivo riba su propio isla. E poder democratico di e poblacion local a wordo neutralisa pa un politica di inmigracion habri, cu a aumente te na un 400% den e inmigracion di no- Bonerianonan, den su mayoria Hulandes Europeo, cu e poder di voto dentro di tres luna. Riba e ritmo aki, e Bonerianonan a bira un minoria riba na mesun isla, representando rond di un tercio di e poblacion y ta riba e caminda di un proceso sistematico di exterminio. Un nacion amigabel y humilde lo extingui den un of dos decada si nos no ricibi intervencion of yudansa di e comunidad internacional y/o di nos rumannan Caribense.
E accionnan aki, un recreacion claro di un agenda colonial agresivo di Hulanda den Caribe, a mantene nan mes sistematicamente pafo di e atencion di e comunidad internacional y di prensa internacional y regional.
E carta ta sirbi como un advertencia serio na tur nacionnan Caribense di cu colonialismo a bin bek den Caribe den un forma institucionalisa y modernisa. Nos rumannan isla di Corsou, Aruba y St. Maarten, ta ariba e mesun caminda pa wordo recolonialisa administrativamente pa Den Haag. Riba e islanna aki, Den Haag a tuma e control over di su asuntonan interno ora di nombra un hunta di supervision financiero no democratico cu ta dicidi riba e presupuesto di e islanan, su parlamento y nan gobierno. Igual ta e caso di e sistema hudicial cu ta bou di control di Den Haag y ta dicidi ken ta e obhetivo politico cu lo wordo persigui si e no colabora cu e agenda Hulandes.
E carta aki ta sirbi como un advertencia serio pa tur nacion y organisacion Caribense cu ta traha pa unidad y integracion den Caribe, cu colonialismo ta bek den Caribe den un forma mas agresivo. Nos pueblo indigena local di Caribe ta e obhetivo di un proceso di limpiesa etnico. Nos tera y nos recursonan natural a bay bek den man di e poder administrativo colonisador.
Nos speransa ta cu tur nacion y lidernan di Caribe uni como un solo voz, pa mustra solidaridad cu nos, pa rechasa e recolonisacion di nan compatriotanan y apoya specialmente e gobierno democraticamente eligi y e pueblo di St. Eustatius cu a bay corte contra di e continuacion di colonialismo Hulandes”.