Pa di dos aña consecutivo “Aruba” su nomber a resona, durante di e Fashion Show “Be Beautiful Be Yourself 2016”, organisa pa “Global Down Syndrome Foundation”. Esaki tabata e momento cu e hobencito cu Down Syndrome, Jake Lacle a modela riba e runway di Be Beautiful Be Yourself den Hyatt Regency Hotel na Denver Colorado, kende a laga tur esnan presente asombra ora cu el a sak y saluda tur esnan sinta dilanti di e runway.
Jake Lacle, yiu homber di Andy y Marien Lacle, tambe tabata tin e oportunidad pa cana riba e red carpet hunto cu e artistanan renombra manera: Hilary Swank, Jamie Foxx, Queen Latifah, Peyton Manning, Matt Dillon, John C. McGinley, Amanda Booth y Mario Lopez.
Fuera di manda un otro hoben special (Down Syndrome) Jake Lacle pa representa Aruba durante di e Evenemento grandi aki Be Beautiful Be Yourself, Fundacion Sea Bunita Sea Bo Mes tabata tin e oportunidad di combersa cu artistanan manera Matt Dillon, John Mc Ginley y e Presidente di “Global Down Syndrome” Michelle Whitten tocante e importancia di Inclusion/Aceptacion di nos hobennan special den nos Sistema di enseñansa y cuido medico!! Tambe a entrevista varios otro artista entre otro Jamie Fox y Queen Lativa.
Fundacion Sea Bunita Sea Bo Mes kier a gradici entre otro: Hilton Aruba Caribbean Resort & Casino, Aruba Airport Authority, Superfood Plaza y nos Comunidad en general pa e sosten necesario pa por a haci e biahe aki posibel y exitoso pa nos hoben y hendenan special.