Como tata Jairo Maduro ta sinti pa hopi tata cu nan yiu a pasa den tipo di casonan di abuso cu berdad bo kier tuma accion. Pero e miho conseho lo ta pa haci denuncia y no laga e cos aki asina aki pasobra si bo keda keto nunca e caso lo haya su atencion.
E ta hopi indignante y e ta algo cu ta duna hopi rabia. Si ripara e reaccion di hopi tata riba rednan social, prome cos cu nan kier haci ta bay torno e sospechoso. Den e caso aki en berdad ta loke ta duna gana di haci, pero ta nos mes ta perhudica cu tipo di casonan asina.
Loke ta conseha e mama, tata, tanta, rumannan, pa por fabor, papia cu e yiunan. Concientisa nan over di e tema aki pasobra e ta alarmante. Nan mester papia tocante di e tema aki prome pa gana confiansa di e muchanan, pa esaki no ta un taboo y e mamanan, nan no ta nan so den esaki. Si boso ta sufriendo y bibando un caso asina aki, bin padilanti, awo mas cu nunca ta e oportunidad pa bin padilanti pasobra union ta haci forsa. Tur hunto mester uni pa yega na un cambio y pa Ministerio Publico, esta e huesnan tambe realisa cu e casonan ta mas alarmante cu nan mes ta pensa di loke nan ta haya loke ta wordo poni riba papel.
Papia cu e yiu, scucha e storia y haci denuncia of trece den claridad pasobra di un of otro forma, nos mester stop esaki.
No por stop’e completamente, pero por brak’e hopi si e storianan aki cuminsa bin den claridad, si pueblo cuminsa haya sa ken ta ken, e ora ta sigur cu ta bay frena e abuso di menornan aki drasticamente, segun Maduro.
E ta sigui splica cu e ta bira algo hopi fastioso pasobra den e sentido ken bo ta bay confia en berdad. Esaki ta mustra cu pedofielnan no tin color, no tin rasa, no tin religion, no tin nada. E pedofielnan por bisti gewoon un bachi di Aruba, of por bisti un bachi di pastoor, of cualkier otro bachi y aparenta ta un otro hende. Abo mester tin e confiansa den bo yiu y bo mester siña e yiu na kico e tin cu tene cuenta cune y siña deal cu hende y si tin algo cu ta medio for di sla y no ta cuadra cu norma y balor, trece dilanti y fren’e eynan, Maduro a splica.