Jairo Boekhoudt di Igualdad Aruba ta lamenta cu di un dia pa otro un politico ta hala atras riba un ley cu e mes a sostene den Parlamento. Mirando e campaña cu Igualdad Aruba a hiba durante ultimo lunanan y cu a logra pasa e amienda di union civil, ta lamenta cu na e puntonan aki sr. Glenbert Croes ta tuma un ponencia opuesto y ta bay contra di invoering. Pero si tin cu bisa cu ta respeta su ponencia y ta bay sigui cu dialogo y pa por compronde miho tambe.
E topico di union civil no tabata uno hopi facil pa comunidad di Aruba y esey por mira tambe den e E-petitionnan cu a wordo yena. Por a mira cu mayoria persona cu tabata pro pa e amienda, ta hendenan di edad relativamente hoben, esta bao di 40 aña. Ya aki por mira un division di opinion den comunidad segun edad y generacion. Cu esaki segun Boekhoudt, Igualdad Aruba no ta wak esaki como un derota, sino parti di e causa cu lo ta haya personanan cu no ta bay ta di acuerdo cu e causa den su totalidad y esaki ta hopi biaha a base di falta di informacion. Ainda hopi hende ta pensando den comunidad cu union civil ta algo identico na matrimonio y esey ta algo cu ta bay sigui traha duro, a base di hecho cu por mustra na comunidad di Aruba cu esey no ta e hecho, cu e santidad di matrimonio ta bay keda intacto. Ta lamenta cu esaki ta un tema no politico. Esaki ta un tema di derechonan humano. Ta derechonan di igualdad cu personanan di mesun sexo of personanan di sexo opuesto cu no ta desea di drenta den un enlace matrimonial, por haci beneficio di esaki pa proteha nan bienes y tambe otro derechonan di union familiar.