Willemstad Curacao: Den cuadro di vacatura nan “kritische functies 2022” cu Ministerio di Husticia tin, recientemente Minister di Husticia Shalten Hato a propone durante conseho di Minister un comandante nobo pa guia y lidera e Cuerpo di bombero cu a cuminsa awe, 16 di october 2023. Sr. Jair Tromp a keda nombra como ambtenaar den e funcion como comandante pa Cuerpo di Bombero Curacao despues di un proseso di solicitud exitoso for di cual su persona a sobresali durante di e proseso aki. Sr. Tromp den pasado a fungi como Comandante
General di Cuerponan di Brandweer na islanan BES.
E ta di isla natal Aruba, na unda tambe su persona a laborá amplio na dje, sr. Tromp ta dispone di un conosemento amplio den e materia di Brandweer y lo ta sigur un adkision importante den desaroyo di e Cuerpo di Brandweer Curacao.
Como comandante nobo, sr. Tromp entre otro lo mester zorg pa implementacion di e asina yama “Plan di Fortificacion Brandweer” (Verstevigingsplan Brandweer) cual trayekto lo atende e siguiente areanan di atencion:
1) Organicion y funcion,
2) Areglo di posicion huridico,
3) Sistema di formashon profecional,
4) Ley y regla,
5) Plan di comunicacion interno y externo.
Durante e prome dia di trabou na Brandweer Curacao, comandante di Brandweer Curacao, sr Tromp a tene un recorido pa cera conoci cu e instalacionnan di Brandweer, cera conoci cu tanto e personal di kantor y tambe e personal di warda. Adicional sector director di Ministerio di Hustisia, sr. Gerold Daantje a haci entrega oficial na nomber di Minister Shalten Hato, e yabi di oficina, di vehiculo, uniform y demas articulonan importante pa funcionamento di e comandante.
Na final a haci uso di e oportunidad pa un foto di e team di maneho nobo di Brandweer Curacao. Durante e proximo dianan lo pasa pa cera conoci cu demas personal di warda y durante siman lo bishita e instalacionnan di brandweer na aeropuerto Hato y Refineria Isla.
Na nomber di Brandweer Curacao un Bon Bini na Comandante Jair Tromp den nos Cuerpo.