Diabierna ultimo pa 12:30 di merdia a drenta informacion di un boto local den problema na mas o menos 8 miya pazuid di Barcadera. Mesora a activa Polisnan Maritimo cu a sali cu nan boto pa brinda asistencia. Ultimamente nan ta hayando bastante yamada pa e tipo di asistencianan asina, esta di botonan cu ta daña den lama.
Na momento cu Polis a yega na e sitio, a tuma nota cu e boto “Jahziana” cu matricula A-25 tabatin dos persona abordo. Nan a bay busca combustibel na Venezuela pero riba nan ruta di regreso e motor a tranca pa cual nan a dicidi di bati alarma mesora. A topa cu nan pazuid di e boortorennan y asina a cuminsa “sleep” nan pa waf di Barcadera.
Mester menciona cu Polis ta consciente di e hecho cu diariamente tin botonan local ta “klaar uit” for di Aruba, ta sali pa e costa mas cerca di Venezuela pa cumpra gasolin barata. Sinembargo, e acto aki ta ilegal! Lamentablemente e grupo cu ta haci nan mes culpabel na e acto aki, ta tene mas cuenta cu e placa y e negoshi ilicito cu nan ta haciendo y no ta tene cuenta cu nan propio siguridad.
Gastonan pa sali cu boto di Polis pa bay “sleep” un otro boto na 8 miya di distancia ta halto y ta yega momento pa Gobierno evalua si den futuro mester cuminsa cobra ora cu pa motibo di negligencia di e mesun capitan, cu mester sali pa brinda asistencia.
Danki Dios cu e biaha aki e storia a caba positivo, pero e por tabata diferente, pa cual ta sigui apela na capitan di e botonan pa no haci chansa cu lama y pa percura pa e boto ta den bon condicion prome cu opta pa risca Bo bida y di otronan pa crusa lama grandi pa Venezuela sin cu e motor ta den top condicion.