Torneo HEINEKEN softball fast pitch femenino di Aruba Softball Bond cerando añ 2016 a continua fin di siman na veld di Dragon Hitters. Den e prome partido Jaguars ta mantene su invicto derotando e ekipo hoben esta Rebels cu score di 12-2. Jaguars 12 careda, 10 hit, 0 eror. Rebels 2 careda, 2 hit, 3 eror. Rachelle Henriquez ta bay henter e wega y ta resulta pitcher ganado. Shatienne Kock tambe ta bay completo pero ta bay cas cu e derota. Mester bisa cu e ekipo di Rebels ta uno cu hopi talentonan hoben entre 14 y 18 aña kendenan ta experenciando un nivel di AA pero ta batayando anto alegre. Miho bateadonan pa Jaguars tabata Carolina Kock di 2-2, Milvienne Henriquez y Cathleen Geerman ambos di 3-2. Pa Rebels a conecta e dos imparabelnan Laurie Bomans 1-1, Zjaka Kock di 3-1. Cu e resultado aki Jaguars ta comandando e tabla di posicion cu 3 gana y 0 derota y Rebels cu 0-3 enbusca di nan prome victoria. Den di dos wega Aruba Bank Lady Tigers ta baha fuerte riba e muchanan di Rubia Ras esta Tanki Leendert Girls pa asina gana un wega importante. Aruba Bank 7 careda, 10 hit, 0 eror. Tanki Leendert Girls 1 careda, 2 hit, 0 eror. Rudlyn Ras ta bay henter e ruta poniendo e victoria riba su nomber mientras Jertiza Ras ta bay cas cu e derota. Miho bateadornan ta Nikkaela Jacobs 4-2, Jennifer Chirino 3-2, Illajay Tromp, Yolaisha Ridderstap y Yonina St Yago tur a bay di 3-1, Carienne Brete di 2-1. Nikkaela Jacobs ta conecta un cuadrangular. Pa Tanki Leendert Girls a destaca na plato Jelitza Ras y Mildred Kock ambos di 2-1. Aruba Bank Lady Tigers despues di prome weekend ta cu un record di 2-1 mientras Tanki Leendert Girls su record ta 1-2. Weganan lo continua diabierna awor 2 di December cuminsando pa 6:30pm Jaguars vs Rebels y pa 8:15pm Aruba Bank vs Tanki Leendert y lo continua diasabra 3 di December 6pm Rebels vs Aruba Bank Lady Tigers y pa 7:45pm Tanki Leendert Girls vs Jaguars. Diadomingo 4 di December cuminsando pa 10:30am Rebels vs Tanki Leendert Girls, 12:15pm Jaguars vs Aruba Bank. Si Jaguars gana tur su partidonan incuyendo Aruba Bank den di dos buelta Jaguars lo bira e ganado di e torneo. Si Aruba Bank gana tur su weganan y gana Jaguars diadomingo lo forsa un wega decisivo extra diadomingo 4 di December 2:15pm cu lo ta e gran final. Tur wega ta na veld di Dragon Hitters na Barcadera. Fanaticada bin apoya bo ekipo preferi.