WASHINGTON , Merca (AP) — E reciente revelacionnan riba e alcance di e uzo di email personal di Ivanka Trump na White House lo ta bou di revision minicioso pa parti di e democratanan di e Camara di Representantenan ora cu nan a asumi e cargo na januari.
E Comision pa Supervision y Reforma di Gobierno di e Camara di Representantenan a cuminsa e revision e uzo di email priva di aña pasa despues di cu algun informe di Politico a revela cu e casa di Ivanka Trump, Jared Kushner y otro funcionarionan di White House lo a uza nan email personal cu finnan gubernamental den loke ta un violacion na e ley di Archivo Presidencial y otro leynan federal riba e mantenimento di registronan.
E representante Elijah Cummings, di Maryland, cu probablemente lo asumi e puesto di presidente di e comision, diamars a bisa cu e lo cuminsa cu e investigacion bipartidista bek, cual a wordo bandona pa e Republicanonan.
Cummings lo presiona gobierno di presidente Donald Trump pa entrega e registronan riba e uzo di email personal pa asuntonan publico pa Ivanka Trump, Kushner y otro funcionarionan importante.
“Mi meta ta pa evita cu esaki pasa un biaha mas, pa e no bira un espectaculo di mesun forma cu e Republicanonan a haci cu Hillary Clinton”, Cummings a bisa. “Mi prioridad mas grandi como presidente di e comision ta pa focus riba e temanan cu ta impacta e Mericano den su dia a dia”.
E cuestion a sali bek na luz e siman aki despues di cu e corant The Washington Post a raporta cu e yiu di e presidente, cu ta fungi como consehero na White House, a manda mas di shen email tocante asuntonan gubernamental for di su cuenta personal aña pasa.
E emailnan a wordo manda pa colaboradonan di White House, miembronan di e gabinete y asistentenan di e yiu di e presidente, hopi di nan violando reglanan di e registronan publico, según The Post.
Den comentarionan dilanti reporteronan, presidente Trump, cu aña pasa a ataca Clinton pa e uzo di e email personal pa asuntonan publico mientras e tabata fungi como secretario di Estado, a purba di kita importancia y diferencia e uzo di e email priva pa parti di e yiu di su ex rival.
E vocero di e abogado Ivanka Trump, Abbe Lowell, no a refuta e informacion di e corant.