Ivan Simonovis a sa di scapa for di su aresto domiciliario (huisarrest) cu e tabata tin y el a ricibi indulto for di presidente encarga, Juan Guaido.
Guaido a precisa cu e liberacion di e comisario ta proveni di e accionnan cu a wordo tuma den cuador di e “Operacion Libertad”.
“Ivan Simonovis ta den pleno derecho di libertad, despues di a haya indulto for di Guaido dia 30 di april ultimo, den ehecucion di Operacion Libertad”, Guaido a expresa durante un conferencia di prensa.
Mester recorda cu Ivan Simonovis, cu tabata e oficial encarga cu e siguridad di Alcaldia Mayor di Caracas, a wordo sentencia na 30 aña di prizon pa e susedidonan di dia 11 di april 2002 na Puente Llaguno.
E dia aki 19 persona a perde nan bida den un marcha no autorisa di oposicion cu tabata na caminda pa Miraflores.
Na november 2004, Simonovis a wordo aresta y na 2006, e huicio contra di su persona hunto cu otro hefenan halto y funcionarionan policial a cuminsa.
Na 2009, Simonovis, hunto cu e comisarionan Henry Vivas y Lazaro Forero, a wordo condena pa “complicidad comparti” na 30 aña di prizon pa fayecimento di dos ciudadano, Erasmo Sanchez y Rudy Urbano Duque.
Na 2014 a otorga huisarrest na Simonovis pa problemanan di salud.