Inspeccion di Salud Aruba (IVA) y Ministerio di Salud Publico a tuma nota cu actualmente tin hopi oferta pa tratamentonan medico/estetico riba diferente pagina social manera entre otro ‘Vraag en Aanbod’ riba Facebook.
Sigun ley na Aruba, solamente personanan cu diplomanan reconoci y registra na Departamento di Salud Publico Aruba (DESPA) por eherce nan trabou como medico. Pues, personanan cu ta duna cualkier tipo di tratamento medico sin autorisacion ta actuando contra ley y lo por wordo persigui door di Ministerio Publico. E ofertanan medico aki riba Facebook ta alarmante no solamente paso e personanan ta actua contra di ley pero tambe pa motibo di e riesgonan grandi di salud ora ricibi tratamento medico for di personanan cu no tin e autorisacion di DESPA. E educacion y competencia profesional di e individuonan aki no por wordo garantisa. Pues clientenan ta core e riesgo di ricibi un cuido medico cu no ta cumpli cu e standard nacional exigi den e Ley di Calidad di Cuido.
Por presenta casonan caminda cu e tratamentonan ta wordo haci den luganan cu no ta adecua of cu aparatonan cu no ta steriel, of remedinan cu ta wordo uza y no a wordo controla door di e Seccion di Remedi di IVA. Tur esaki por aumenta e probabilidad pa complicacionnan manera intoxicacion, infeccion (por ehempel HIV, Hepatitis B), amputacion y te hasta morto. Pa e motibo aki, personanan trahando sin autorisacion of esunnan cu ta yuda promove nan servicio ta poniendo un otro persona su salud y bida den peliger.
IVA ta urgi tur ciudadano pa informa bon prome cu dicidi di ricibi cualkier tratamento medico. Pa siguridad di tur cliente, ta sumamente importante pa e dunado di cuido tin e cualificacion rekeri y ta registra na DESPA. Si no ta sigur si un dunado di cuido ta registra, semper por tuma contacto cu DESPA na 5224200 pa puntra e informacion aki.
IVA ta na altura tambe cu tin hopi hendenan local cu ta bay den exterior pa ricibi tratamentonan medico/estetico. Den e casonan aki ta importante pa tene den mente cu si algo bay robes, e cliente no lo tin e siguridad di por haci un denuncio di e dunado di cuido aki. Esaki ta pa motibo cu e tratamento no a wordo haci na Aruba mes.
IVA y e Ministerio di Turismo, Salud y Deporte kier enfatisa cu no lo accepta practicanan medico ilegal y lo denuncia cualkier persona cu no tin e autorisacion pa practica medicina na Aruba.
Si tin cualkier pregunta of si bo tin cualkier informacion di practicanan medico ilegal, por tuma contacto cu IVA na 5262160 of via email na [email protected].