Inspectie der Volksgezondheid tin un bon relacion cu Douane, caminda cu tin hopi remedi ta wordo para na nos fronteranan. Pero e productonan ta keda drenta Aruba. Y pa esaki tin cu subi caya pa controla. Sra. Dorylee Lopez, directora di Inspectie Volksgezondheid ta splica.
E accionnan manera cu Departamento di Higiena a haci ultimo, ta algo cu IVA lo por haci, pa asina kita e productonan aki for di mercado. Pueblo mester ta consciente cu e remedinan aki no tin control ariba nan. No tin control di temperatura, no tin informacion di con nan a wordo traha y tampoco treci. No sa con e tin e intercambio cu remedinan cu e persona ta tuma caba, prescribi pa su dokter. Mester cana e caminda corecto y cuminsa na papia cu dokter, cu e remedi no ta yuda, cual no, cual si. E persona por haya su mes den peliger tumando remedinan cu niun hende no sa di unda nan ta bin.
No ta tur hende ta sali cu tur tipo di remedi, pa cual Sra. Lopez a splica cu cada curpa ta diferente. Mester wak precies kico e persona tin, pa por wak kico e por tuma. E caminda primordial ta keda dokter y botica. Cumpra un remedi na fruteria of un supermercado, niun hende sa di unda e ta bin y di calidad e tin. E ora ta purba di informa e pueblo tambe, pa por fabor purba di no cumpra remedi ariba caya, si no sa di unda e ta bini.
IVA ta trahando pa cera e portanan pa medicina ilegal, pero esaki ta hopi dificil. IVA tin un bon relacion cu OM, Douane, etc. Tambe ta purba di controla tur loke ta wordo bendi ariba Facebook pa locual ta remedinan. Pero IVA ta trahando duro pa preveni entrada di remedinan ilegal.
Locual cu kier preveni ta e shopping around, unda cu’n persona ta bira adicto na cierto remedinan y su dokter ta preveni di receta e remedi aki, pa bouw af e adiccion, pero e pashent ta bay busk’e na otro caminda.
Por ultimo, Sra. Lopez a bisa pa e pueblo bay nan dokter, bay botica y evita di cumpra remedinan for di tercera persona, cual por tin su efectonan. Ta purbando pa keda cla cu IVA su plan di maneho y vision pa 2019, unda cu nan por presenta tur nan proyectonan pa 2019. Esey lo ta un bon momento pa informa pueblo di kico ta e intencion y riba kico nan ta bay traha, pa asina por traha mas miho na 2019 tambe.